पैदाइस 29

याकूब की लाबान लक भेंट

1 याकूब न अपरी रस्ता धरयो, अना दिन उगती को देस कन गयो। 2 ओना आपरो डोरा लक चोवयो का बर्रा मा एक बीहर से, ना वोको जवर सेरी-मेंढी को तीन करप बस्यो हुयो सेत। काहेका जोन गोटा उ बेहर को वरता होतो उ भारी होतो अना वोला हटाय के पानी पिलायो जात होतो। 3 अना जब सब करप वहांन जमा होय जावत होतो तबा चरावन वालो उ गोटा ला बिहर लक गंडलाय के सेरी अना मेंढी ला पानी पिलात होतो, अना मंग गोटा ला बीहर पर जसो को तसो राख देत होतो। 4 तबा याकूब न चरावन वालो लक पूसीस "अगो भाऊ तुम किता लक आयो सेव?" उ उनला कह्यो, "अमी हारान नगर लक आयो सेजन। 5 तबा याकूब ना उनको लक पूसयो, का तुम्ही नाहोर को नाती लाबान ला जानासो?" उनना कह्यो, "हव, वोला जानासेजन।" 6 तबा ओना उनको लक पूसयो, का उ साजरो से? उनना कहीन हव साजरो से, चोव ओकी टूरी राहेल सेरी मेंढी को हेड़ ला धरके आवा से। 7 याकूब न कह्यो, "चोव अबा ता लगत बेरा से, जनावर गिनको करप जमा होन को बेरा नही भयो सेत। एकोलाय सेरी- मेंढी ला पानी पिलाय के मंग चराओ।" 8 उनना कह्यो, "अमी अबा असो नही करा सकत। काहेका जब सप्पा करप जमा होहेत तबा बिहर पर को गोटा गंडलायो जाहेत। अना तबा अमी सेरी-मेंढी गिनला पानी पिलाबिन।" 9 उनकी यो गोस्टी होय रह्यो होतो का राहेल जोन जनावर चरात होती अपरो अजी को सेरी-मेंढी को हेड़ ला धर के आय गयी। 10 याकूब ना अपरो मामा लाबान की टूरी राहेल अना ओकी सेरी-मेंढी को हेड़ ला चोवयो तो जवर जाय के बिहर को वरता लक गोटा ला गंडलायो अना अपरो मामा लाबान की सेरी-मेंढी ला पानी पिलायो। 11 तबा याकूब ना राहेल को चुम्मा लियो, अना जोर-जोर लक रोयो। 12 अना याकूब ना राहेल ला सांग दियो, कि मी तोरो फुफिया भाऊ सेऊ, मजे रिबका को टुरा सेऊ। तबा राहेल धाव के आपरो अजी ला साग देइस। 13 अपरो भास्या याकूब को खबर भेटत च लाबान ओको लक भेट करन लाय परायो, अना वोला गरो लगाय के ओको चुम्मा लियो अना आपरो घर आनयो। याकूब न लाबान ला सब गोस्टि को बखान करयो। 14 तबा लाबान न याकूब लक कह्यो, "तू तो सचमुच मोरी हड्डी अऊर मांस सेत।" अऊर याकूब एक महीना भर ओको संग रह्यो।

याकूब ना राहेल अना लिआ को लायी सेवा कियो

15 तबा लाबान याकूब लक कह्यो, "कुटुम्बी होवन को कारन लक तोरो लक फुकट मा सेवा करवानो मोरो लायी सही नहाय एकोलायी मोला सांग का मी तोला सेवा को बदला मा काजक देऊ?" 16 लाबान को दूई टूरी होती, जिनमा लक मोठी को नाव लिआ अना लहानी को नाव राहेल होती। 17 लिआ की डोरा धुंधरी होती, पर राहेल लगत साजरी अना खोबसूरत होती। 18 एकोलायी याकूब ना, जोन राहेल लक पिरेम करत होतो, ओना कह्यो, "मी तोरी लहान टूरी राहेल लाय, सात साल तोरी सेवा करू।" 19 लाबान ना कह्यो, "ओला परायो मानूस ला देवनो लक तोला देवनो साजरो होयेत एकोलायी मोरो जवर रह्य।" 20 तबा याकूब ना राहेल लायी सात साल सेवा करयो, अना यो ओला राहेल को पिरेम को कारन लक थोड़ो च दिवस को बराबर जान पड़यो। 21 तबा याकूब न लाबान लक कह्यो, "मोरी बायको मोला दे, अना मी ओको जवर जाऊ, काहेका मोरो बेरा पूरो भय गयो से।" 22 तबा लाबान ना जघा को सब मानूस गिनला निवता दियो अना बिहाव को जेवन दियो। 23 सन्जा को बेरा उ अपरी टूरी लिआ ला याकूब को जवर ले गयो, अना याकूब ओको जवर गयो। 24 लाबान ना अपरी टूरी लिआ ला अपरी दासी जिल्पा दी का वा ओकी सेवा करे। 25 सक्कारी बेरा मालूम भयो कि या ता लिआ आय, एकोलायी ओना लाबान लक कह्यो, "यो तूना मोरो संग का करयो से? मीना तोरो संग रह्य के जोन तोरी सेवा करयो, ता का राहेल लायी नहीं करयो? मंग तूना मोरो लक असो धोका काहे करयो से?" 26 लाबान ना कह्यो, "आमरो यहांन असी रीति नहाय कि मोठी टूरी लक पहिले लहान को बिहाव कर दे। 27 एको हफ्ता ता पूरो कर, तबा दूसरी भी तोला वा सेवा लायी मिलेत जोन तू मोरो संग रह्य के अखीन सात साल तक करजो।" 28 याकूब ना असोच करयो, अना लिआ को हफ्ता ला पूरो करयो, तबा लाबान ना ओला अपरी टूरी राहेल भी दी का वा ओकी बायको हो। 29 लाबान ना अपरी टूरी राहेल की दासी होन लायी अपरी दासी बिल्हा ला दियो। 30 तबा याकूब राहेल को जवर भी गयो, पर ओना लिआ लक जादा राहेल लक पिरेम करयो, ओना सात साल अखीन लाबान की सेवा करी।

याकूब की सन्तान

31 जब यहोवा ना चोवयो, का लिआ लक नफरत करयो जावासे, तबा ओना ओला लेकरा जलम देवन वाली बनायो। पर राहेल वाखड़ रही। 32 तबा लिआ पोट लक भयी अना ओको एक टुरा पैदा भयो, अना ओना यो कह्यो का "यहोवा परमेस्वर ना मोरो दूख ला चोयो से अना अबा मोरो नवरा मोरो लक पिरेम करहेत एकोलाय ओको नाम रूबेन रख्यो।" 33 तबा मंग वा पोट लक भयी अना ओको एक टुरा पैदा भयो, तबा ओना यो कह्यो, "यो आयक के कि मोरो लक नफरत करयो गयी से, यहोवा ना मोला यो टुरा भी दियो।" एकोलायी ओना ओको नाम सीमोन*29:33 आयकन वालो रख्यो। 34 तबा वा मंग पोट लक भयी अना ओको एक टुरा पैदा भयो, अना ओना कह्यो, "अब ता मोरो नवरा मोरो लक मिल जायेत, काहेका ओको लक मोरो तीन टुरा पैदा भयो।" एकोलायी ओको नाव लेवी रख्यो गयो। 35 अना अखीन उ पोटलक भयी अना ओको एक अखीन टुरा पैदा भयो अना ओना कह्यो, "अब ता मी यहोवा को धन्यवाद करू।" एकोलायी ओना ओको नाव यहूदा रख्यो; तबा ओकी कोख बंद होय गयी।