Gênesis 38

यहूदा अखीन ओकी बहू तामार

1 वोना बेरा मा काजक भयो कि यहूदा अपनो भाऊ गीनको जवर लक चली गयो, अना हीरा नाव को एक अदुल्लाम नगर को निवासी को जवर रव्हन लग्यो। 2 उत यहूदा न सूआ नाव को एक कनानी मानूस की टूरी ला चोवयो अखीन ओको लक बिहाव करके ओको जवर गयो। 3 वा पोट लक भयी अना ओको एक टुरा पैदा भयो, अना यहूदा ना ओको नाव एर रख्यो। 4 वा मंग पोटलक भयी, अखिन ओको एक टुरा पैदा भयो, अखीन ओको नाव ओनान रख्यो। 5 तबा ओला अखीन एक टुरा पैदा भयो, अना ओको नाव सेला रख्यो, अखीन जोन बेरा एको जलम भयो ऊ बेरा यहूदा कजीब नगर म रव्हत होतो। 6 अना यहूदा ना तामार नाव की एक टूरी लक अपरो मोठो टुरा एर को बिहाव कर दियो। 7 पर यहूदा को उ मोठो टुरा एर यहोवा परमेस्वर की नजर मा बुरो होतो, एकोलायी यहोवा परमेस्वर ना ओला मार डाखयो। 8 तबा यहूदा न ओनान लक कह्यो, "तू अपरी भवजी को जवर जाय, अखीन ओको संग देऊर को धरम पूरो कर के अपरो भाऊ को लायी सन्तान पैदा कर।" 9 ओनान जानत होतो कि जोन सन्तान होहेत वो मोरो नही कहलायेत, ता जब ऊ अपरी भवजी को जवर गयो, तबा ओना जमीन मा आपरो बीज गिराय के नास करयो, जेनको लक वोको भाऊ को नाव नोको चले। 10 यो काम जो ओना करयो परमेस्वर को नजर मा बुरो होतो, अखीन परमेस्वर ना वोला मार डाखयो। 11 तबा यहूदा न यो डर को मारे कि कही असो नहीं होय कि अपरो भाऊगीन जसो सेला भी मरे, अपरो बहू तामार लक कह्यो, "जब तक मोरो टुरा सेला जवान नहीं भयी जाये तबा तकन तू अपरो अजी घर मा बेवा च बसी रह्य।" एकोलायी तामार अपनो अजी को घर मा जाय के रव्हन लगी। 12 लगत दिवस बीतन को मघानी यहूदा की बायको जोन सूआ की टूरी होती, वा मर गयी; तबा यहूदा दुख को दिवस बितन पर अपरो संगी हीरा अदुल्लाम वासी सहीत अपरी अपरो सेरी-मेंढी को हेड़ समेत ऊन कतरन वालो को जवर तिम्नाथ नगर ला गयो। 13 अना तामार ला यो खबर भेटयो का "तोरो ससरो अपरी सेरी मेंढी कि हेड़ को ऊन कापन को लाय तिम्नाथ नगर ला जाय रह्यो से।" 14 तबा ओना यो सोच के कि सेला जवान त होय गयो पर मी वोको बायको नहीं होय सकी, तबा अपरो बेवापन को कपरा उतारयो अना घूघंट डाक के अपरो आप ला झाक लियो, अना एनैम नगर की बेसकुड़ को जवर, जोन तिम्नाथ की रस्ता मा से वहान जायके बस गयी। 15 जब यहूदा ना वोला चोवयो ता ओना वोला बेसिया समजयो, काहेका वोको चहेरा लुको हुयो होतो। 16 ऊ रस्ता लक ओको तरफ मुरकयो अना वोको लक कव्हन लग्यो, "मोला अपरो जवर आन दे," काहेकी वोला यो मालूम नही होतो का वा वोको बहु आय। ओना कह्यो, "यदि मी तोला अपरो जवर आवन देऊ, ता तू मोला काजक देजोस?" 17 ओना कह्यो, "मी आपरो सेरी कि हेड़ मा लक एक पाठी तोरो जवर धाड़ देऊ।" तबा ओना कह्यो, "तबा तकन मोरो जवर तू काही चीज रख दे?" 18 यहूदा ना पुसयो "मी तोरो जवर काजक जूनूस रख देऊ?" तामार न कह्यो, "अपरो मुहर, अना बाजूबन्द, अना अपरो हात को डन्डा।" तबा यहूदा ना वोला यो सप्पा जुनूस दे दियो अना वोको जवर गयो, अना वो वोको लक पोट लक भयी। 19 तबा वा उठ के चली गयी, अना आपरो घूघंटा उतार के आपरो बेवापन को कपरा मंग घाल लियो। 20 तबा यहूदा ना सेरी को एक पाठी आपरो संगी उ अदुल्लाम वासी को हात धाड़ दियो का जोन जीनूस रहेन मा सेत वोला वा आईमाई को हात लक सूड़ा के ले आय, पर वा बायको वोला नही मीली। 21 तबा हीरा ना एनैम को लोक हुन लक वा बेसिया बायको को बारेमा पूसयो पर वोको कही च पता नही चलयो। 22 एकोलायी ओना यहूदा को जवर जाय के कह्यो, "मोला वा नहीं मिली; अना वोना जघा को लोक ना सांग दियो का यहान कोनी असो बेसिया बाई नाहात।" 23 तबा यहूदा न कह्यो, "अच्छा, वा निसानी को जूनूस ओकोच जवर रव्हन दे, नहीं त हम लोग बेकार गिन्यो जाबीन, चोव मी ना सेरी को पाठी धाड़यो होतो पर वा तोला नहीं मिली।" 24 लगभग तीन महिना को मघानी यहूदा ला यो खबर भेटयो "तोरी बहू तामार ना गलत काम करयो से अना वा पोट लक सेत।" तबा यहूदा ना कह्यो "ओला बाहेर ले के जाव अना वोला पेटाव।" 25 जब लोग ओला बाहेर हेड़ रह्यो होतो तबा ओना अपरो ससरो को जवर यो खबर धाड़ीस, जोन मानूस को यो जूनूस से वोको लक मी पोट लक सेऊ। तबा ओना यो कह्यो, "ओरख ता सही कि यो मुहर, अना बाजूबन्द, अना डन्डा कोनको आय।" 26 यहूदा ना वोला वोरख के कह्यो, वा ता मोरो लक कम दोसी से। काहेका मी ना वोको संग आपरो टूरा सेला ला नही रव्हन दियो। अना वोको लक कभ्भू दुबारा सम्बन्ध नही बनायो। 27 जब ओको जचकी को बेरा आयो ता मालूम भयी का वोको पोट मा जोड़का लेकरा से। 28 अना जब वा लेकरा पैदा करन लगी तबा एक लेकरा को हात बाहेर आयो अना सुईन न लाल सूत ले के ओको हात मा यो कव्हतो हुयो बांध दियो, "पहिले योच पैदा भयो।" 29 जब बच्चा न अपरो हात भितर कर लियो, तबा ओको भाऊ पैदा भयो। तबा वा सुईन न कह्यो, "तूना कायलाय खुदच हिटन की रस्ता बनाय लियो?" एकोलायी ओको नाम पेरेस*38:29 फूट पड़नो रख्यो गयो। 30 पीछू ओको भाऊ जेको हाथ मा लाल सूत बंध्यो होतो ऊ पैदा भयो, अऊर ओको नाम जेरह*38:30 चमक रख्यो गयो।