1 A Got, ka ri pagan’ug;

Bay gu tang nggu pining e sorok ngom!

Lanin’ug, mu od!

2 Talin e musik rok ni harp nge lyre, mu odgow!

Bay gu pug e yal’ nge od.

3 A SOMOL, bay gu pining e magaer ngom u fithik’ e pi nam.

Bay gu pining e sorok ngom u fithik’ e pi girdi’.

4 T’ufeg rom ni dabimus e keded nga p’ebgul e pi tharmiy;

ma fenam yul’yul’ e ke tun nga lanelang.

5 A Got, mu dag feni sorom u lanelang,

nge fanam muluplup’ u ga’ngin e fayleng.

6 Mu ayweg e pogofan romad u gelngim; mu fulweg taban e meybil rog,

ya nge dabi buch ban’en ko pi’in yad ba t’uf rom.

7 Par Got u tagil’ nib thothup me ga’ar,

"Kug gel ere fare binaw nu Shekem e bay gu pag e f’oth ngay,

mu gu f’oth fare loway nu Sukkoth rok e girdi’ rog.

8 Gilead e ba milfan ngog, ma ku errogon yu Manasseh;

Efraim e urwach rog

ma Judah e fare sog ko pilung ni fanag.

9 Machane bay gu tay yu Moab ni barba’ i dabiy ni yima maluknag eg riy,

ma bay gon’ e sus rog nga daken yu Edom,

ni pow riy nib milfan ngog.

Bay gu tolul ni kug gel ngak e pi Filistine."

10 A Got, i mini’ e ra fekeg ngalan fare binaw ni kan yororiy ni fan ko mael?

Mini’ e bayi pow’iyeg nga Edom?

11 Rriyul’ ni kam n’agmad?

Mog, dab kum un ngak e salthaw romad ko mael?

12 Mu ayuwegmad u pa’ e to’ogor romad;

ya ayuw ko girdi’ e bm’ayfan.

13 Ra bay Got u ba’ rodad ma gadad ra gel;

Ir e bayi gel ngak e pi to’ogor rodad.