PSALMS 64

Ba meybil ni fan ko ayuw

1 Got, ku gu aw nga fithik’ e oloboch — mmotoyil ko meybil rog!

Mu ayuweg e pogofan rog ya gu be rus ko pi to’ogor rog!

2 Mu ayuwegneg ko pi makath rok e pi’in kireb,

nge yu raba i girdi’ ni kireb e leam rorad.

3 Yad be uthum bolowtherad ni bod yungi saydon,

yad be pulweg e thin ni kireb ni bod bogi gan e gat’ing.

4 Ri yad papey ni ngar gararegned e mululifith l’ugun rorad;

yad be kirebnag e pi’in bfel’ nda rir rusgad.

5 Yad be pi’ lanin’rad ko pi makath rorad ni kireb;

yad be weliy murung’agen e gin ngar ted e pi wup rorad riy.

Ma yad be ga’ar, "Dariy be’ nrayag ni nge guy."

6 Yad ma t’ar liyben e tin kireb me lungurad,

"Ri bfel’ rogon ni kad ta’red liyben e re kireb ney."

Rriyul’ ni laniyan’ nge tafnay rok e girdi’ e dab nnang fan.

7 Machane, me pag Got e gat’ing rok ngorad,

miyad maad’ad nib tomgin.

8 Bayi thangrad ni bochan e pi thin nem;

gubin e pi’in nra guyrad miyad chichingeg lolgurad.

9 Ma aram e bay rrusgad ni yad gubin;

bay ra leam niged murung’agen e n’en ke rin’ Got

ngar welyed murung’agen e gafarig rok.

10 Gubin e pi’in nib mat’aw e bay ra felfelan’gad

ni bochan e n’en ke rin’ SOMOL.

Ir e bay ra pir’eged e gapas rok;

Gubin e girdi’ nib manigil e bay ra pininged e sorok ngak.