1 Gu be gum’an nigeg gu be sonnag Got ni nge ayuwegneg;

kemus ni ir e gu ma toer ngak.

2 Kemus ni ir e be yororiyeg mma mat’aw nigeg ngak;

ir e ma n’ufeggeg,

ni dariy e n’en nra rin’ mu gu waer.

3 Bu uw n’umngin nap’an ni ngkum chamgad ngak be’

nike bod feni waer ba yoror nike m’ing?

4 Kemus ni gimed ba’adag ni ngam girngiyed nga but’ u tagil’ nib gil;

ma bfel’ u wan’med e sasalap.

Gimed ma yog e thin ni fel’faen,

machane lanin’med e be gernagey.

5 Kemus ni Got e gu be toer ngak;

ni ir ke l’agan’ug ngak.

6 Kemus ni ir be yororiyeg mma mat’aw nigeg ngak;

ir e ma n’ufeggeg,

ni dariy e n’en nra rin’ mu gu waer.

7 I Got e ir e ke ayuwegneg ma ke gagiyegnag kan tayfag;

Ir fare yoror rog nib gel;

ma ir e manaf rog.

8 Gimed pi girdi’eg, nge pagan’med ngak Got ni gubin ngiyal’.

Mu weliyed ngak urngin e magfan’ romed,

ya ir e manaf rodad.

9 Girdi’ ni gubin e yad bod ba wuchuth i nifeng

pi tolang nge pi sobut’ e ta’reb feni dariy rogorad ngabang.

Yira thabthabel nagrad, ma dariy malngirad;

yad bba’ud nga ba wuchuth i nifeng.

10 Dabi pagan’med nga fanmed yargal;

dabi l’agan’med ko n’en ni yibe iring;

ma ku ra mun daken e fel’ rogon romed,

ma dabi pagan’med ngay.

11 Ke yo’oryay ni kug rung’ag nike yog Got

ni gelngiy e bmilfan ngak,

12 ma fare t’ufeg rog e dabimus.

A Somol, i gur e ga ma pi’ puluwon urngin e girdi’ nib m’ag ko ngongol rorad.✝