PSALMS 137

Meyor ni tay piyu Israel u Babylon

1 Nap’an ni yib yu Zion nga lanin’mad ma gamad par nga but’

u to’oben e yu pa’ i lul’ nu Babylon ngu’ug yorgad.

2 Ma gamad the’ e pi tatelin e musik romad ni harp

nga l’ugun yu ke gek’iy ni willow ni bay u to’obmad.

3 Ma pi’in kar koled gamad ko mael e rogned ngomad ni nggu tanggad;

rogned ngomad ni nggu tang niged yad ni lungurad,

"Mon’ed reb e tang ni murung’agen yu Zion nggu rung’aged!"

4 Uw rogon ni nggon’ed e tang rok SOMOL

u lan yugu reb e nam?

5 Jerusalem, fa’anra gu pag talim,

ma mang e yigi yan i aw ndabkiyag ni gu chubeg e harp bayay!

6 Ma fa’anra dab kumub ngan’ug,

ara dab ku gu leam nigem ni gur e felfelan’ rog nth’abi ga’,

ma mang e yigi yan i aw ndabkiyag ni gu tang bayay!

7 SOMOL, mu leamnag e n’en ni rin’ e pi Edomite

ko fa rofen nem nni kol yu Jerusalem ko mael.

Mu leamnag rogon ni i lungurad,

"Mu buthuged nge mada’ nga daken e but’!"

8 Babylon, bay ni kireb nigem!

Ra felfelan’ e en ni ir e bayi fulweg labgen ngom

ni bochan e tin kam rin’ ngomad,

9 ni bayi fek pifakam ni kab ran

ngi i morothiyrad nga daken ba war!