PSALMS 96

Got e ir fare pilung ni Th’abi Tolang

1 Mu tang niged SOMOL nga ba tang nib be’ech!

Gimed e girdi’ nu fayleng ni polo’, mu tang niged SOMOL!

2 Mu tang niged SOMOL ngam pininged e sorok ngak!

Gubin e rran ni ngam weliyed ngak e girdi’ fare thin ni bfel’ ni murung’agen nike mat’aw nagdad ngak!

3 Mu weliyed ngak e pi nam murung’agen gelngin,

mi gimed weliy ngak urngin e pi nam e pi maang’ang nike ngongliy.

4 I SOMOL e ba sorok, ere thingar ni pining e sorok ngak;

thangri ga’ madgun u wun’uy ngak urngin e pi got.

5 Urngin fapi got rok boch e nam e kemus ni bogi liyos,

machane SOMOL e ir e sunumeg lanelang ni ga’ngin.

6 Maluplup’ nga feni rir e ke liyeg’,

feni sorok nge feni gamog e ke suguy e Tempel rok.

7 Gimed gubin e girdi’ nu fayleng, mu pininged e sorok ngak SOMOL!

Mpininged e sorok nga feni muluplup’ nge feni gel gelngin!

8 Mpininged e sorok nga feni maluplup fithingan SOMOL;

mfeked ba maligach ngam badnag ngalan e Tempel rok.

9 Mu siro’gad u p’eowchen fa’anem nib Thothup ko ngiyal’ nra yib i m’ug riy;

fayleng ni polo’, mu t’on u p’eowchen!

10 Mogned ngak urngin e nam ni nge lungumed, "I SOMOL e ir e pilung!

Fayleng e kan tay nga tagil’ ndabiyag ni ngan mithmitheg;

rib yal’uw rogon ni bayi pufthinnag e girdi’."

11 Fayleng nge lanelang, mu felfelan’gow!

Day, mu chub ni ba ga’ lingam, ma ku arrogon gubin e yafos ni bay u fithik’am;

12 mu fefelan’gad gimed gubin e pi flang, nge gubin ban’en ni bay u dakenmed!

Pi gek’iy u magerger e bay ra tolul niged e felfelan’

13 nap’an ni bayi yib SOMOL ni nge gagiyegnag e fayleng.

Bayi gagiyegnag girdi’en e fayleng

nib mat’aw rogon, ma dabi laniyan’.