1 A Got, dab mu par ni kam th’ab gulngam;

yug dab mu par u lom, ni dabmog ban’en!

2 Amsap, pi to’ogor rom e kar chelgad kar maelgad nib togopluw ngom,

ma pi’in yad be fanenikem e yad be togopluw.

3 Yad be puruy’ nib mith nib togopluw ngak e tirom e girdi’;

yad be makath nib togopluw ngak e pi’in ga ma yororiyrad.

4 Yad be ga’ar, "Mired, ngad thirifed e re nam rorad ney,

ya ngan pagtalin yu Israel ndabki yib ngan’uy bi’id."

5 Me ta’reb e puruy’ rorad ngay

ni ka ra ta’rebgad ni ngar togopluwgad ngom:

6 ni aram fapi girdi’ nu Edom nge pi Ishmaelite;

nge girdi’en yu Moab nge pi Hagrite;

7 nge girdi’en yu Gebal, Ammon, nge yu Amalek,

nge yu Filistia nge yu Tyre.

8 Miki chagil yu Assyria ngorad;

kar manged ngak e pi Ammonite nge Moabite, pi cha’ney e pi’in owchen Lot.

9 Mu rin’ ngorad ni bod ni mu rin’ ngak e pi Midianite,

nge Sisera nge Jabin ko fare Lul’ nu Kishon.

10 Gur e mu gel ngorad u Endor,

ni mel e ldow rorad u daken e but’.

11 Mu rin’ ngak e pi tayugang’ rorad e n’en nim rin’ ngak Oreb nge Zeeb;

mu gel ngak gubin e pi tagagiyeg rorad ni bod ni mu gel ngak Zabah nge Zalmunna,

12 ni fa’an ni lungurad, "Bay da feked nge milfan ngodad

fare binaw nib milfan ku Got."

13 A Got rog, mu weregrad ni bod e fiyath,

ni bod e chabung ni changagnag e nifeng.

14 Bod e nifiy ni urfiy e loway,

nge daramram ni mo’oruf e yochi burey,

15 mu tulufrad ko yoko’ ni ga ma pi’

ma ga k’aring e marus ngorad nga nifngim nib gel.

16 A SOMOL, mu upnguy owcherad ko tamra’

nge mang e yigi yag nra gayed Gur.

17 Mang e yug ra waergad miyad rus ni dariy n’umngin nap’an;

mang e yugur m’ad ni rib m’ayfarad.

18 Mang e yugur nanged ni kemus ni gur e SOMOL,

ni gur fare tagagiyeg Nib Th’abi Tolang u polo’ e fayleng.