PSALMS 80

Ba meybil ni fen e nam ni nge sul nga rogon

1 Gur fare tagafaliy e saf nu Israel, mmotoyil ngomad;

mu rung’ag e meybil romad, gur e tagagiyeg romad.

Kam par nga tagl’im ngalang ko kerubim

2 mu gagyel nigem ngak e pi ganong ko Efraim, Benjamin, nge Manasseh.

Mu dag gelngim ngomad!

moy ngam ayuwegmad!

3 A Got, mu fulwegmad!

Mu dag e runguy rom ngomad, ya nge dabi buch ban’en romad!

4 SOMOL ni Got ni Gubin ma Rayag Rom, bu uw n’umngin nap’an,

ni ngam par ni gab damumuw ko pi meybil rok e girdi’ rom?

5 Kam pi’ e kireban’ ngomad ni nggu wed,

nge ba kap i lu’ nib ga’ ni nggu umumed.

6 Kam pag e pi nam nib liyegmad ni yad be chamnag e binaw romad;

ma be yog e to’ogor romad e thin ni kireb ngomad.

7 Got ni Gubin ma Rayag Rok, mu fulwegmad!

Mu dag e runguy rom ngomad, ya nge dabi buch ban’en romad!

8 Kam fek ba pa’ i grape u Egypt;

ka mu tuluf girdi’en e fapi nam ma ka mu yung nga daken e binaw rorad.

9 Kam tamilangnag mit ni nge tugul;

ke yan lik’ngin nib to’ar’, ke fana’ daken e fare nam.

10 Ke taglul’nag e pi burey,

ma pa’pa’ngin e ke taglulnag e pi cedar ni gagang’ kan.

11 Ke yan pa’pa’ngin ke mada’ ko day ni Mediterranean fithingan,

ma yan nge taw ko lul’ ni Eufrates.

12 Mangfan ni kam buthug e yoror riy?

Chiney e gubin e girdi’ ni be yan u charen e rayag ni nge iring wom’ngin;

13 ma be yot’yot’ e pi babiy ni malboch nga but’,

ma gamanman ni malboch e be damunmun riy.

14 Got ni Gubin ma Rayag Rok, mu sul ngomad!

Mu changar u tharmiy ngomad nga but’;

moy ngam ayuweg e girdi’ rom!

15 Moy ngam ayuweg e re pa’ i grape ney ni mu yung,

re pa’ i grape ney ni kafin mu yung ma ke ilal ke gel!

16 Pi to’ogor romad e kar paged e nifiy ngay ma kar th’abed nga but’;

mu changar ngorad u fithik’ e damumuw ngam thirifrad u but’!

17 Mu ayuweg ma ga yororiy e girdi’ ni gur e mu mel’egrad,

ni fare nam ni mu gagiyegnag ngi i par nib gel.

18 Ma aram e dab kug pi’ed keru’mad ngom bayay;

mu taymad ni gamad bfos, ma gamad pining e sorok ngom.

19 SOMOL ni Got ni Gubin ma Rayag Rok, mu fulwegmad.

Mu dag e runguy rom ngomad, ya nge dabi buch ban’en romad.