1 Gu pining SOMOL ni nge ayuwegneg;

gu wenig ngak.

2 Gu fek i yib ngak urngin e tin be magafan’ug ngay;

gog ngak urngin e gafgow rog.

3 Nap’an nra yan ni nge mulan’ug,

ma manang e tin nthingar gu rin’.

U lan e kanawo’ ni gin gu be yan riy,

e ke pacheg e pi to’ogor rog ba wup ni nggu aw ngay.

4 Gu ra changar u chireg,

mug guy ndariy be’ nra aywegeg,

dariy be’ nra yoror rog.

Dariy be’ nra magfan’ ngog.

5 SOMOL, gu be yornag e ayuw ngom;

i gur, SOMOL, e manaf rog;

kemus ni gur e pagan’ rog ko biney e tamilang.

6 Mu telim ngog ni gu be ning e ayuw,

ya kar gu bilig t’ay e gafgow!

Mu ayuwegneg u pa’ e to’ogor rog;

ya dabyag gelingrad rog.

7 Mu chuwegeg u fithik’ e gafgow ni kug aw ngay;

ma aram e gu ra pining e sorok ngom u lane mu’ulung rok e girdi’ rom

ni bochan e ri gab gol ngog.