1 A Got, mu rung’ag e meybil rog;

dab mu pi’ keru’um ko wenig rog!

2 Mmotoyil ngog ma ga fulweg lungug;

ya ke li’eg e magafan’ rog.

3 Ke k’aring e pi to’ogor rog e marus ngog ko thin ni togopluw,

kug masengseng ko gafgow ni be tay e pi’in kireb e leam rorad ngog.

Yad be girengiy e oloboch nga dakenag;

yad be damumuw ngog ma yad be fanenikayeg.

4 Ku gu rus,

doguwen e yam’ e ke dil’iyeg.

5 Ke koleg e dugow gu be da’da’;

ku gum’ ko morus.

6 Yigi yib pog ni bod e arche ni dove,

nggu changeg nga bang nggu pir’eg e gapas.

7 Gu ra changeg nga bang nib palog,

ngu ngongliy tafnag u daken e ted.

8 Gu ra gur nigeg ngu pir’eg e gin nggu gif ngay

ngu chuw ko nifeng ni gel nge yoko’.

9 A Somol, mu balyangnag e welthin ko pi to’ogor rog!

Gu be guy e cham nge wagagay u lan e binaw,

10 ni be liyeg ni rran nge nep’,

ma be suguy ko oloboch nge wagagay.

11 Gubin yang ni yibe wodmang riy;

ke suguy e kireb nge sasalap e yupa’ i kanawo’.

12 Fa’an mang e ba to’ogor rog e be dariyfan nigeg,

mra yag ni nggu k’adan’ug;

fa’an mang e ba togopluw rog e be girig ngog,

ma gu ra mith rok.

13 Ma dangay ya gur, ni gadow ngabang,

ni gadow nga maruwel ma gadow fager.

14 Ud welyew salpadow ngodow

mu ud liyorgow u ta’bang u lan e Tempel.

15 Mang e yigi yim’ e pi to’ogor rog ni dawori taw nga nap’rad;

mang e ranod ni kayad bafos nga’ar ko fayleng ko yam’!

Ya ba sug gumircha’rad nge lan taferad ko kireb.

16 Machane gu be ning e ayuw ngak SOMOL ni Got,

ma bayi ayuwegneg.

17 Kadbul, misiw’, nge nep’

gun’gun’ rog nge gel’gel’ e be yan ngak ngalang,

mra rung’ag lungug.

18 Bayi fulwegneg ni dariy ban’en nra buch rog

ko pi mael ni gu be tay

ngak bo’or e to’ogor.

19 Got, niki i gagiyeg aram ko tobolngin i yib,

e ra rung’ag lungug me waer nagrad;

ya daburad ni ngar thilgad,

ma dariy madgun u wan’rad.

20 En immoy nri gamow e ke cham ngak pi fager rok;

ke thilyeg e tin ni micheg.

21 Thin rok e ba munguy ko che’,

ma gumircha’en e ba sug ko fananikay;

thin rok e bod feni sumnguy e gapgep,

machane ma th’abey ni bod yungi saydon nib m’uth.

22 Mu pi’ e gilab rom ngak SOMOL,

ma bayi n’ufegem;

dariy e ngiyal’ nra pag e pi’in yul’yul’ ngar mo’waergad.

23 Machane, gur Got, e bay mon’ e pi’in tathang e fan nge pi’in sasaliyab nga low rorad

ni dawor i yan baley ko yafos rorad.

Me gag, e gur e bayi pagan’ug ngom.