1 Mu pininged e magaer ngak SOMOL, ya SOMOL e bfel’,

ma t’ufeg rok e ba manemus.

2 Girdi’ nu Israel e nge lungurad,

"T’ufeg rok e ba manemus."

3 Pi prist rok Got e nge lungurad,

"T’ufeg rok e ba manemus."

4 Urngin e pi’in bay madgun SOMOL u wun’rad e nge lungurad,

"T’ufeg rok e ba manemus."

5 U fithik’ e ngochngochan’ rog mu gu pining SOMOL,

me fulweg lungug nge chuwegeg u fithik’.

6 I SOMOL e bay rog, ere dab gu rus;

mang e rayag ni rin’ be’ ngog?

7 I SOMOL e be ayuwegneg,

ma bay gguy e pi to’ogor rog ni kar waergad.

8 Kabfel’ ni nge pagan’uy ngak SOMOL

ko bin ngan toer ko girdi’.

9 Kabfel’ ni nge pagan’uy ngak SOMOL

ko bin ngan toer ngak e pi girdi’ ni tagagiyeg.

10 Pi to’ogor rog ni pire’ e ron’edgag nga longob;

machane mu gu li’rad nga gelngin SOMOL!

11 Rabad ra longobiyedgag;

machane gu li’rad nga gelngin SOMOL!

12 Ra mu’ulunggad ngog ni bod e ngul,

machane ra gak’gad ni bod feni pay e pan ni gak’;

gelngin SOMOL e gu li’rad ngay!

13 Ni cham ngog nib elmerin mu gu waer,

machane SOMOL e ayuwegneg.

14 I SOMOL e be pi’ gelngig gu be par ni gub gel;

I ir e gu bay u pa’ ni be ayuwegneg.

15 Mu telmed nga lunguy ni yibe garusnag ni kan gel u lan e pi tent ko tirok Got e girdi’ ni be lungurad,

"Gelngin SOMOL nib gel e ke yodoroynag!

16 Gelngin e ke gel nagdad ko mael,

ni fare gelngin nma gel ko mael!"

17 Dab gum’, ya bay gu par ni gubfos

nggu weliy murung’agen e tin ke rin’ SOMOL.

18 Ke gechig nigeg nib elmerin,

machane dawori pageg ni nggum’.

19 Mu binged e pi garog ko Tempel ngog;

ya nggu wan nga langgin nggu pining e magaer ngak SOMOL!

20 Irera’ e garog rok SOMOL;

kemus ni pi’in bmat’aw e rayag ni ngranod riy!

21 SOMOL, gu be pining e magaer ngom, ya kam rung’ag e meybil rog,

ma kam gel nigeg!

22 Fare malang ni dabuy e pi’in yad ma toy e naun ya ra fineyed ndariy fan,

e yan i aw ni aram e re malang ni ir e ba th’abi ga’fan.

23 Ren’ey e SOMOL e yodoromnag;

rib gamog u owchey!

24 Re rran nem e reb e rran nrib fel’ nike ngongliy SOMOL;

ere ngad felfelan’gad ma gadad ngongliy e madnom!

25 Mu ayuwegmad, SOMOL, mu ayuweg e pogofan romad!

SOMOL, mu aywegmad nge yan i aw ni bfel’ e tin ni nggu rin’ed!✝

26 Mang e yigi fal’eg Got wa’athan e en ke yib u fithingan SOMOL!

U Tempel rok SOMOL e nggu fal’eged wa’atham riy.

27 I SOMOL e ir Got; rib fel’ e tin ke rin’ ngodad.

Ngam tababgad ko madnom ni bay yu pa’ i gek’iy u pa’med

mi gimed thelap ngam liyeged e altar.

28 I gur e Got rog, ere gu be pining e magaer ngom;

bay gu weliy murung’agem nga feni sorom.

29 Mu pininged e magaer ngak SOMOL, ya bfel’,

ma t’ufeg rok e ba manemus.