1 SOMOL, gu be pining e magaer ngom u polo’ i lanin’ug;

Gu be tangnag e sorok ngom u p’eowchen e pi got.

2 Gub sap ko Tempel rom ni thothup,

ni gu be siro’, ma gu be pining e sorok nga fithingam

ni bochan e t’ufeg rom ni dabimus nge fanam yul’yul’,

ni bochan kam dag ni fithingam nge tin kamog ni ngan rin’ e ba mathangeluwol.

3 Kam fulweg lungug u nnap’an ni gu piningem;

gelngim e mu gel nigeg ngay.

4 SOMOL, gubin e pilung nu fayleng e bay ra pininged e sorok ngom,

ya kar rung’aged e tin kam micheg.

5 Bay ra tang niged murung’agen e tin kam rin’

nge murung’agen feni gilbugwam.

6 Yug aram rogon nri gab tolang ngalang,

ma ga ma runguy e pi’in yad ba sobut’,

ma pi’in ba tolangan’rad e dabyag ni ngar mithgad rom.

7 Nap’an nra ingeg e oloboch,

ma ga yoror rog.

Ga ma gad pa’am ngak e pi to’ogor rog ni kar damumuwgad

mag ayuwegneg rorad nga ngelngim.

8 Bay mu rin’ urngin e tin kam micheg;

SOMOL, tuf’eg rom e ba manemus.

Mmu’nag e maruwel ni kam tababnag.