1 SOMOL, ri gab gol ko nam rom.

Ka mu fla’abnag yu Israel bayay.

2 Ka mu n’agfan e denen rok e girdi’ rom;

ma ka mu n’agfan urngin e kireb rorad.

3 Ka mu tal ko damumuw ngorad;

ni kar mu kadan’um u gelngin e damumuw rom.

4 A Got nta’ayuw romad, mu fulwegmad,

ma dab ku mu dabuymad!

5 Mog, ngam par ni gab damumuw ngomad ni dariy n’umngin nap’an?

Mog, nge par e damumuw rom ni dabi chuw bi’id?

6 Mu gel nagmad bayay,

ma aram e gamad e girdi’ rom e bay gu pininged e sorok ngom.

7 A SOMOL, mu dag ngomad fare t’ufeg rom ni dabimus.

Ma ga pi’ ngomad e ayuw nggu mat’awgad ngom.

8 Gu be motoyil ko n’en ni be yog SOMOL ni Got;

gapas e be micheg ngodad e girdi’ rok,

ni fa’anra dab kudsulod ko yupa’ i kanawo’ rodad ni oloboch.

9 Riyul’ nra mat’awnag ngak e pi’in ni bay madgun u wan’rad,

nge par e muluplup’ rog u lan e nam rodad.

10 T’ufeg nge yul’yul’ e yow ra mada’;

mat’aw nge gapas e yow ra gamuchmuch nga ta’bang.

11 Yul’yul’ rok e girdi’ e bayi yan u fayleng ngalang,

ma feni bmat’aw Got e bayi changar u tharmiy nga but’.

12 I SOMOL e bayi man’og nagdad,

ma but’ rodad e bayi fel’ mit e woldug riy.

13 Mat’aw e ra yan nga p’eowchen SOMOL

nge fal’eg rogon kanawo’en.