1 I SOMOL e ba ga’ ma ngan pining e bin th’abi tolang e sorok ngak

u lan fare binaw rok e Got rodad, ngu daken e burey rok nib thothup.

2 Zion e fare burey rok Got nib tolang ma ba gamog,

ni fare binaw rok ba pilung nib ga’ nma pi’ e felfelan’ nga ga’ngin yang u fayleng.✝

3 I Got e ke dag ni ir e matnag

u lan fare binaw ni kan yororiy ni fan ko mael.

4 I mu’ulung e pilung nga ta’bang

ngarbad ni ngar chamgad ko Burey ni Zion,

5 ma nap’an nra guyed, me gin’anrad;

miyad rus ngar milgad.

6 I m’agrad e marus riy nge amith u rom,

ni bod be’ ni bpin ni nge gargeleg bbitir,

7 ni bod e pi barkow ni be yin’rad e day ko yoko’.

8 Kad rung’aged e n’en ke rin’ Got,

ma chiney ma kadguyed

u lan fare binaw rok e Got rodad, ni fare SOMOL ni Gubin ma Rayag Rok;

e bayi ayweg fare binaw ni dabi buch ban’en riy bi’id.

9 A Got, u lan e Tempel rom,

e gamad ma leamnag riy e t’ufeg rom ni dabimus.

10 Girdi’ u gubin yang e yad be pining e sorok ngom,

ma bugwam e ke garer u fayleng i yan.

Ga ma gagiyeg nib mat’aw;

11 nge felfelan’ e girdi’ nu Zion!

Ga ma pufthin nib mat’aw;

nge felan’ e pi binaw nu Judah!

12 Girdi’en Got, mmarod ngam liyeged yu Zion ngam the’eged e pi wulyang;

13 mu yaliyed fapi rungrung mi gimed sikengnag e pi yoror ni fan ko mael,

ya ngam ga’argad ngak e bin migid e mfen:

14 "Re Got ney e Got rodad ni manechibog ko pichibog,

i Ir e bayi pow’iydad e chiney i yan ngaram."