1 Ke sorok SOMOL!

Mu pininged e sorok nga fithingan, gimed e pi tapigpig rok SOMOL,

2 gimed gubin e pi’in gimed ma pigpig u naun rok SOMOL,

u lan fare Tempel ko Got rodad.

3 Mu pininged e sorok ngak SOMOL, ya ba manigil;

mon’ed e tang ni gimed be pining e sorok nga fithingan, ya ba gol.

4 Ir e ke mel’eg Jakob ni nge milfan ngak,

nge girdi’ nu Israel.

5 Gumnang ni SOMOL rodad e ir e ga’,

ba ga’ ngak urngin e pi got.

6 Demturug e tin ba’adag SOMOL me rin’

u tharmiy ngu daken e fayleng,

ngu lan e day ngu t’ay e regur.

7 Ir e ma fek yungi manileng ko yoko’ u tungun e fayleng i yib;

mma mateg e uluch u fithik’ e yoko’,

ma ir e ma l’oeg e nifeng u lan e chibgil rok nge yib.

8 I thang owchen gubin e tin nganni’ u fakay u lan yu Egypt

ni girdi’ nge gamanman ni ta’reb rogon.

9 Mu rom e fal’eg e maang’ang riy nge tin ma balyangan’uy ngay

ni nge gechignag fare pilung nge gubin e ga’ ko salthaw rok.

10 I gothgothey bo’or e nam

me thang owchen e pi pilung nib gel gelingrad.

11 I Sihon, ni pilung rok e pi Amorite,

Og, ni pilung u Bashan,

nge urngin e pilung nu Kanaan.

12 Me pi’ e binaw rorad ngak e tirok e girdi’;

ni pi’ nga Israel.

13 SOMOL, gur e gubin ngiyal’ ni bay unognem ni gur e Got;

gubin e mfen ni bay um par u wun’rad.

14 I SOMOL e ra n’ufeg e girdi’ rok;

ma ra i kirban’ ngak e pi tapigpig rok.

15 Fapi got ko pi nam e ni ngongliyrad ko silber nge gol;

ni pa’ e girdi’ e ni chamayrad ngay.

16 Bay langrad, machane dabyag ni ngar nonad,

nge owcherad, machane dab ra guyed ban’en.

17 Bay telrad, machane dabiyag ni ngar rung’aged ban’en;

mus ni ngar pogofangad ma dabyag.

18 Mange yigi gubin e pi’in ni ngongliyrad ni be michan’rad ngorad

miyad bod pi liyos nem ni kar ngongliyed!

19 Mu pininged e sorok ngak SOMOL, gimed e girdi’ nu Israel;

mu pininged e sorok ngak, gimed e pi prist rok Got!

20 Mu pininged e sorok ngak SOMOL, gimed e pi Levite;

mu pininged e sorok ngak, gimed gubin e pi’in gimed ma liyor ngak!

21 Ngan pininged e sorok ngak SOMOL u lan yu Zion,

ngu lan yu Jerusalem, ni tafen.

Ke sorok SOMOL!