1 SOMOL, rib manigil ni ngan pining e magaer ngom,

mi ni tang ni yibe pi’ fithingam ngalang, gur Got nib Th’abi Tolang,

2 gubin e kadbul mi ni weliy rogon e t’ufeg rom ni dabimus

nge fanam yul’yul’ ni yibe weliy ni gubin e nep’,

3 ko talin e musik ni bay e seng riy

nge harp ni yibe chubeg ni bfel’ lingan.

4 A SOMOL pi maruwel rom nib thum’ ngaru’ e gu ba felan’ ngay;

ma bochan e n’en ni ka mu rin’, mu gu tangnag e felfelan’.

5 SOMOL, rib th’ab feni fel’ e ngongol rom!

Ma rib to’ar e tafnay rom!

6 Irera’ ban’en ni dabi nang be’ nib balyang;

be’ nib minan’ e dabi nangfan:

7 pi’in kireb e leam rorad e manga yad ra ilal ni bod e pan,

ma pi’in yad ma ngongliy e kireb e manga yad ra man’og;

machane bay ni thirifrad u but’,

8 ni bochan ni gur SOMOL, e th’abi tolang ni manemus.

9 Gamad manang ni pi to’ogor rom e bay ra m’ad,

ma gubin e pi’in kireb ni bay ra waergad.

10 Ka mu gel nigeg kug bod feni gel ba garbaw ni malboch;

ma ka mu tow’ath nigeg ko felfelan’.

11 Kug guy e pi to’ogor rog ni kar waergad

ma kug rung’ag e meyor ko pi’in kireb.

12 Pi’in nib mat’aw e bay ra dommalgad ni bod e gek’iy ni palm;

yad ra ilal ni bod e cedar nu Lebanon.

13 Yad bod e gek’iy nni yung ngalan e naun rok SOMOL,

ni be dommal u lan e Tempel rok e Got rodad,

14 nike pilbithir ma ku ma k’uf

ni ku be par ni kab galunglung ma ku ba gel.

15 Be dag ni SOMOL e bmat’aw,

ma dariy ban’en nib kireb ko en ma yororiyeg.