PSALMS 76

Got e ir e ke Ge!

1 Got e go’ yim nang u Judah;

ma yima mathangeluwolnag fithngan u Israel.

2 Tabnaw rok e bay u Jerusalem;

ma ir e ma par ko Burey ni Zion.

3 U rom e t’ar e pi gan e gat’ing rok e pi to’ogor riy,

nge shield nge saydon rorad, gubin talin e cham rorad.

4 A Got, ri gab gil,

ma ri ga ba tolang rok e pi burey ni yug ma par.

5 Pi salthaw rorad nib m’uthan’rad e kan fek urngin e tin immoy rorad

ma chiney e kar molod ni yam’;

ni gelngirad nge urngin e pi salap rorad e yi go’ ke m’ayfan.

6 A Got rok Jakob, nap’an ni mu puwan’ ngorad,

me aw e os nge pi’in nma yan u os nga but’ ni karm’ad.

7 Machane gur SOMOL, e go’ yibe rus ngom.

Dariy be’ nrayag ni nge sak’iy u p’eowchem

nnap’an ni gab damumuw.

8 Tiriggil rom e kamog u tharmiy kannang;

me rus e fayleng me th’ab gulingan,

9 nap’an ni mu sak’iy ngam weliy e n’en ni ka mu tirigiliy,

ni ngan ayuweg gubin e pi’in yibe gafgow nagrad u fayleng.

10 Damumuw ko girdi’ e kemus ni be gelnag feni sorom;

ma pi’in de yim’ ko mael e bay ur madnom niged gur.

11 Mu pi’ed ngak SOMOL ni Got romed e tin kam micheged ngak;

gimed gubin e pi nam ni gimed ba chugur, mu feked e tow’ath romed i yib ngak.

Got e ma gagiyegnag e girdi’ ngar rusgad ngak;

12 ma sobut’nag lanyan’ pipifak e pilung ni tolngan’rad,

ma k’ar marus ngak e pi pilung nib gel.