PSALMS 53

Kireb rok e Girdi’

1 Pi’in yad bbalyang e ma lungurad u lanin’rad,

"Dariy e Got."

Yad gubin ni kar kirebgad,

yad be rin’ bogi ban’en nrib gel e kireb riy;

dakuriy ta’bagayad ni be rin’ e tin ni bfel’.✝53:1 53:1–3 Rom 3:10–12

2 I Got e be changar u tharmiy nga but’ nga daken e girdi’

ni nge guy ko bay bochiyad nib gonop,

ara bay be’ ni be liyor ngak fa dariy.

3 Machane yad gubin ni kar pi’ed keru’rad;

yad gubin ni ta’reb farad kireb.

Dariy bagyad ni be rin’ e n’en ni bfel’,

ni ta’bagyad ma dariy.

4 Me fith Got ni ga’ar, "Gur, dar nanged?

Gur pi chan’ey ni yad be ngongliy e kireb e de tamilngan’rad?

Kar pired ni yad be mororo’ ko tirog e girdi’ u fithik’ e yargal,

ma dariy bangiyal’ ni yad ma meybil ngog."

5 Machane aram e bayib e marus ngorad nib gel,

ndawor rrusgad bayay ni aram gelngin,

ya bayi wereg Got yilen e pi to’ogor ko girdi’ rok.

I Got e ke n’agrad,

ma aram e yu Israel e ri bay ra gelgad ngorad.

6 Ri gu be meybil ni nge yib e ayuw

u Zion nga Israel.

Rra felfelan’ e girdi’ nu Israel

ko ngiyal’ nra fal’eg Got rograd bayay!