1 A SOMOL, ni gur e yoror rog, gu be piningem,

mmotoyil ko meyor rog!

Fa’anra dab mu fulweg lungug,

ma bay gu’un ngak e pi’in ngranod nga’ar ko fayleng ko yam’.

2 Mu rung’ag lungug u nap’an ni gu ra man ayuw ngom,

ko ngiyal’ ni ku gu chibiy pa’ag ngalang ko Tempel rom nib thothup.

3 Dab mu unegeg ko pi’in kireb ngam gechig nigeg,

ni pi’in yad ma ngongoliy e kireb

nib sumunguy e thin rorad,

machane ba sug lanin’rad ko fananikan.

4 Mu gechig nagrad ni fan ko n’en karin’ed,

ni fapi kireb ni kar ngongoliyed.

Mu gechig nagrad ko gubin e ngongol rorad;

mu gechig nagrad ni rogon ni nge aw ngorad!

5 Darir leam niged e tin ke rin’ SOMOL

ara tin ke sunumiy;

ere bayi gechig nagrad

ni nge thang owcharad ni manemus.

6 Ngan pining e sorok ngak SOMOL;

ya ke rung’ag lungug ni gu be man ayuw.

7 SOMOL e ayuw rog ma yoror rog;

ma ir e ba pagan’ug ngak.

Ma pi’ e ayuw nge felfelan’ ngog;

gu ma pining e sorok ngak ko tang ni felfelan’.

8 I SOMOL e ir gelngin e girdi’ rok;

ma ir e manaf rok e re pilung ni ir e mel’eg.

9 SOMOL, mu ayuweg girdi’em,

ma ga fal’eg wa’athan e pi’in nib mil farad ngom.

Mu par ni gur e tagafaliyrad,

ma ga ayuwegrad ndariy n’umngin nap’an.