1 Gimed e pi tagagiyeg, kay gu mu turguyed ban’en nib mat’aw?

Ba mat’aw rogon ni gimed be pithig e oloboch rok e girdi’?

2 Dangay! Ya kemus n’en nib kireb nrayag ni ngam rin’ed e gimed be leamnag,

ma gimed be k’ar oloboch u lane nam.

3 Pi’in kireb e leam rorad e go’ tin kireb e yad ma rin’ nap’an e yafos rorad.

yug nap’an nni gargalegrad miyad tabab ko sasalap l’ugun.

4 Yad ba sug ko yub ni bod e pi porchoyog;

kar ninged telrad ni bod ba porchoyog ni kobra nib baling,

5 ni der rung’ag lungun e en ma thoy e ngal,

ara tang rok fare salap ko pig.

6 A Got, mu tet’ar nguwolen e pi layon ni tak’ad,

7 Mang e yugu ra m’aygad ngabang ni bod e ran ni lul’ nge m’ay;

mang e yugu notrad nga but’ ni bod e pan u kanawo’.

8 Mang e yugu ra boded e snail nma ranran nge ngal’ ni lamuw;

mang e yugu ra boded bbitir ni yim’ ni dawor i guy ra’en e yal’.

9 U m’on ni dawor ra na’abgad, mi ni th’abrad nga but’ ni bod e pan;

u fithik’ e damumuw rok Got e ra thirifrad u but’

ni ku yad bfos.

10 Ra felan’ e pi’in nib mat’aw ko ngiyal’ ni yad ra guy e pi tadenen ni kan gechig nagrad.

yad ra maluknag e rifrif u ayrad nga racha’en e pi’in kireb.

11 Bayi ga’ar e girdi’, "Pi’in nib mat’aw e rriyul’ ni kan pi pulworad;

rriyul’ ni bay ba Got nma pufthinag e fayleng."