PSALMS 6

Ba meybil ko ayuw ko ngiyal’ nike yib e gafgow

1 SOMOL, dab mu puwan’ ngog ni ga ba damumuw,

ma dab mu gechig nigeg u fithik’ e damumuw.

2 SOMOL, kem’ay gelngig; ere wurengan’um ngog!

Mu pi’ gelngig; ya kri thowparwog

3 ku gu aw nga fithik’ e oloboch.

SOMOL, bu uw n’umngin nap’an ni ngam son, fin mu ayuwegneg?

4 SOMOL, moy ngam ayuwegneg;

u fithik’ e runguy rom e ngam lageg riy ko yam’.

5 U lan e fayleng ko yam’ e dariy be’ ni ga ra yib ngan’ riy;

ma dariy be’ nra pining e sorok ngom u rom.

6 Ke aw parwog ko meyor;

gubin e nep’ nma munur e chob rog nga lu’ag;

gayul rog e ke wanum ko lu’.

7 Ka ri chugur ni nge dab kug guy ban’en;

ya owcheg e kari thow

ni bochan e meyor ni be k’aring e pi to’ogor rog ngog.

8 Mu paloggad rog, gimed e pi’in kireb lanyan’!

I SOMOL e be rung’ag laman e meyor rog;

9 be motoyil ko man ayuw ni gu be yornag

ma bayi fulweg taban e meybil rog.

10 Pi to’ogor rog e bay ra nanged tamra’en e waer,

yug nap’an e ra balyang lanin’rad mi ni tulufrad ngar milgad.