PSALMS 88

Mayor ni fan ko ayuw

1 SOMOL ni Got, ni ta’ayuw rog, gu be yor ngalang ni polo’ e rran,

me nep’ mu gub nga p’eowchem.

2 Mu rung’ag e meybil rog;

mu telim ko mayor rog ni gu be ning e ayuw!

3 Ri bo’or e oloboch nike yib ngog,

nike chugur ni nggum’ riy.

4 Gu bod gubin e pi’in ke chugur ni ngarm’ad;

gelngig ni polo’ e dakuriy.

5 Kan n’ageg u fithik’ e pi’in karm’ad;

kug bod e pi’in kan li’rad karanod nga low rorad,

pi’in kar mu fek an’um rorad,

ni kar thaygad nga wuru’ e ayuw rom.

6 Kam tharbageg nga t’ay e low,

ko gin nrib lumor ma rib to’ar.

7 Gelngin e damumuw rom e kug madle’ riy,

kug parde’ u mirin.

8 Kam gagiyegnag e pi fager rog ni ngar n’aged gag;

kam teg ni kar tamdaggad nga ya’ag.

Kan thabey nigeg ni dabyag ni gu mil;

9 ke me’waer e changar rog ko gafgow.

SOMOL, gubin e rran ma gu ma piningem

ma gu ma meybil ngom ni kug tining pa’ag ngalang.

10 Mog, ga ma ngongliy e maang’ang ni fan ko pi’in karm’ad?

Gur, yad ma suwon ngalang ngar pininged e sorok ngom?

11 Mog, yima weliy u low ko yam’ e t’ufeg rom ni dabimus

ara fenam yul’yul’ ko fa gin’en ni kan fek anuy riy?

12 Gur, yibe guy e maang’ang rom ko fa gin nib lumor

ara fel’ngim ko fare binaw rok e pi’in kanpag talrad?

13 SOMOL, gu be piningem ni gu be man ayuw;

gubin e kadbul ni gu ma meybil ngom.

14 SOMOL, mangfan ni ga be n’igeg?

Mangfan ni ga be mithag owchem rog?

15 Ka nap’an ni kug bochi pagal, ni ug gafgow ngi i chugur ni nggum’;

ku gu me’waer u malngin e pi gechig rom.

16 Mirin e damumuw rom e ke masengseng nigeg;

pi cham rom e ke kal ngog.

17 Polo’ e rran ni yad ba liyegeg ni gowa ba sugbur;

gubin raba’ i chireg ni karbad riy ngog.

18 Mus ko pi fager rog th’abi chuchugur ma kam gagiyegnag e kar n’igedgag,

kemang lumor e ku gu chagil gow.