1 Kemus ni gur, A SOMOL, kemus ni gur

e thingar ni gilnagem, ma gathi gamad,

ni bochan e t’ufeg rom nge fanam yul’yul’ ni dabimus.

2 Mang ni be fithmad e pi nam ni yad be ga’ar,

"Bu uw e Got romed?"

3 Got romad e bay u tharmiy,

ni be rin’ e tin ni be finey.

4 Pi got rorad e ni ngongliy ko silber nge gol,

ni pa’ e girdi’ e ni ngongliy ngay.✝

5 Bay l’ugunrad, machane dabiyag ni ngar nonod,

ma bay owcherad, machane dabiyag ni ngar guyed ban’en.

6 Bay telrad, machane dabiyag ni ngar rung’aged ban’en,

ma bay p’ethungrad, machane dabiyag ni ngar faraboned ban’en.

7 Bay pa’rad, machane dabiyag ni ngar thamiyed ban’en,

bay rifrifen ayrad, machane dabiyag ni ngranod;

ma dabiyag ni nge yan lungurad.

8 Pi’in nra ngongliyed nge urngin e pi’in ke pagan’rad ngorad,

e manga ra boded e pi liyos nem ni yad e ra ngongliyed!

9 Gimed piyu Israel, um pired ni SOMOL e ba pagan’med ngak!

Ya ir e be ayuwegmed ma be yoror romed.

10 Gimed e pi prist rok Got, um pired ni SOMOL e ba pagan’med ngak!

Ya ir e be ayuwegmed ma be yoror romed.

11 Gimed urngin e pi’in bay madgun SOMOL u wun’med, um pired nib pagan’med ngak!

Ya ir e be ayuwegmed ma be yoror romed.

12 I SOMOL e be leam nagdad ma ra fal’eg wa’athdad,

bayi fal’eg wa’athan e girdi’ nu Israel,

nge urngin e pi prist rok Got.

13 Bayi fal’eg wa’athan urngin e pi’in bay madgun u wun’rad,

ni ta’reb rogon e pi’in tolang nge pi’in sobut’.✝

14 Mang e yigi pi’ SOMOL e bitir ngomed,

ni gimed nge pifakmed.

15 Mang e yigi fal’eg SOMOL wa’athmed,

ni Ir e sunmiy e tharmiy nge but’!

16 Tharmiy e kemus ni SOMOL e mmil suwon ngak,

ma fayleng e ke pi’ ngodad e girdi’.

17 Pi’in nib yam’ e darir pininged e sorok ngak SOMOL,

ni pi’in karanod nga’ar ko fare fayleng ni kan th’ab gulungay riy.*

18 Machane gadad, ni gadad bafos, e bay ud pininged e magaer ngak

e chiney i yan nga m’on ndariy n’umngin nap’an.

Ke sorok SOMOL!