1 SOMOL, dab mpag talin David

nge urngin e maruwel ni ngongliy.

2 SOMOL, mu leamnag e n’en ni micheg,

ni mow ni micheg ngom, I gur fare Got rok Jacob, nib Th’abi Gel Gelngin ni ga’ar:

3 "Dab gu wan nga tabinaw rog ara gu wan nga chob;

4 dab gu toffan ara gu mol

5 nge yan i mada’ ko ngiyal’ ni nggu pir’eg bang ni nge par SOMOL riy,

ni nge mang tabinaw ngak fare Got rok Jakob, nib Th’abi Gel Gelngin."

6 Gu rung’aged murung’agen fare Kahol ko M’ag u lan yu Bethlehem,

mu gu pir’eged u daken e ted u Jaar.

7 Me lungumad, "Ngdarod ko naun rok SOMOL;

mired ngdarod ngad liyorgad ngak u p’eowchen ko gin ntagil’!"

8 SOMOL, moy ko fare Tempel, ni gur nge fare Kahol ko M’ag,

ni ir e pow u gelngim,

ngam par u roy ndariy n’umngin nap’an.

9 Manga yigi par e pi prist rom ni gubin ngiyal’ ni yad be rin’ e n’en ni bfel;

manga yigi garusnag e tirom e girdi’ e felfelan’!

10 Mmicheg bbugithin ngak e tapigpig rom i David;

SOMOL, dab mu n’ag e re pilung nem ni gur e mu duwgiliy ni nge mang pilung!

11 Ri mmicheg bbugithin ngak David,

ma dab mu thiliyeg, ya lungum:

"Bay gu gagiyegnag reb i pifakam nge mang pilung,

me ir e bayi gagiyeg u tomrem.

12 Fa’anra par pifakam nib yul’yul’ ko m’ag rog

nge tin gu pi’ ngorad ni thingar rrin’ed,

ma ku er rogon pifakrad ni bay ra boded gur, ni yad e bay u ra manged pilung."

13 I SOMOL e ke mel’eg yu Zion;

ba’adag ni nge ngongliy e tabinaw rok u rom, ya ga’ar:

14 "Irera’ e gin bay gu par riy ndariy n’umngin nap’an;

irera’ e gin gu ba’adag ni ngu’ug gagiyegnag.

15 Bay gu pi’ ngak yu Zion urngin e tin nge yag ngorad;

bay gu pi’ e ggan ngak e pi’in gafgow nge fel’ rogorad ko ggan.

16 Bay gu fal’eg wa’athan e pi prist riy ko urngin ban’en ni yad be rin’,

ma tirok e girdi’ riy e bay u ra tanggad ma yad be tolul ko felfelan’!

17 U roy e bay gu gagiyegnag reb i owchen David riy nge mang reb e pilung ni ba ga’;

u roy e bay gu tay riy nge par nib mudugil e gagiyeg ni nge tay e en ni kug turguy ni nge mang pilung.

18 Bay gu upunguy e pi to’ogor rok ko tamra’,

ma gin bayi gagiyegnag e bayi fel’ rogon me mon’og."