1 SOMOL, mini’ e rayag ni nge th’um ngalan e Tempel rom?

Mini’ e rayag ni nge un ko liyor u Zion, ni fare burey rom nib thothup?*

2 Pi’in yad ma folwok rok Got u fithik’ urngin ban’en,

ma gubin ngiyal’ ni yad ma rin’ e tin ni bfel’,

ma thin ni yul’yul’ e yad ma yog,

3 ma darir t’ared e thin nga daken e girdi’.

Pichaney e darir rin’ed ban’en ni ba kireb ko pi fager rorad,

ma darir thibthib niged e pi’in yad bbuguliyoror.

4 Ma dubrad daken e pi’in ke n’agrad Got,

machane yad ma tayfan e pi’in yad ma fol rok SOMOL.

Ma gubin ngiyal’ ni yad ma rin’ e n’en kar micheged ni ngar rin’ed,

ndemturug ko mang e ra yib riy ngorad.

5 Yad ma pi’ e salpiy ni lon ni darir yin’ed e win rorad ngay,

ma darir feked puluwon e sasalap ni fan e ngar micheged ban’en nib togopluw ngak be’ ni bfel’ e rok.

Cha’ nma rin’ e pin’ey e ba muduwgil u but’ ni dariy ban’en nra buch rok.