1 Fa’anra gathi SOMOL e be toy ba naun,

ma maruwel ko pi’in be toy e mm’ay fan;

fa’anra dabi yoror SOMOL u bbinaw,

ma mm’ay fan e pi’in yad be matanagiy.

2 Dariy fan ni ngan toer ko maruwel nib gel ni yibe tay,

ni ngan od nri kakadbul min mol nike n’uw e nep’,

ya SOMOL e ir e ma pi’ ngak e pi’in yad ba t’uf rok e tin ke t’uf rorad,

u nap’an ni ku yad be mol.

3 Bitir e ba tow’ath nma pi’ SOMOL;

yad e bin riyul’ e tow’ath.

4 Pi bitir ni pumo’on ni fak be’ ni kab pagel

e bod bogi gan e gat’ing ni bay u pa’ ba salthaw.

5 Ba felfelan’ e re mo’on ni bay e mit i gan e gat’ing nem rok!

Ya dabiyag ni nga ni gel ngak

ko ngiyal’ ni yad ra lu’ag e pi to’ogor rok e thin u tagil’ e puf oloboch.