1 Got, mu yoror rog, i gur e pagan’ rog.

2 Be lungug ngak SOMOL, "I gur e Somol rog;

urngin e pin’en ni bfel’ ni bay rog e gur e yib rom."

3 Rib fel’ pi girdi’en SOMOL ni yad ba yul’yul’!

Kargum’ ni bochan ni nggu un ngorad.

4 Pi’in ka ra milgad ngak yugu boch e kan,

e bo’or e gafgow ni ka ra girngiyed nga dakenrad.

Dab gu un ngorad i pi’ e maligach,

ma dab gu tayfan e pi got rorad.

5 SOMOL, i gur e gubin ban’en ngog,

I gur e ga ma pi’ ngog urngin e tin ba t’uf rog;

ma tin kabay e rran u puluwog e bay u lan pa’am.

6 Pi tow’ath rom ngog e rib fel’;

rib manigil ni gubin!

7 Gu be pining e magaer ngak SOMOL, ya ir e be pow’iyeg,

ma lanin’ug e ra nep’ ma be fonow nigeg.

8 Bay SOMOL u lanin’ug ni gubin ngiyal’;

bay nrib chugur ngog, ma dariy ban’en nrayag ni nge rurgeg.✝

9 Ere gu be par ni gu ba felan’ ma bfel’ lanin’ug,

ni gubin ngiyal’ nib pagan’ug;

10 ya ga be yororiyeg u gelingin e yam’,

gu ma pigpig ngom u fithik’ e yul’yul’,

ma dab mu pageg nggu waen ko fayleng ko yam’.✝

11 Bay mu dag ngog fare pa’ i wo’ ko yafos;

i gur e kam suguyeg ko felfelan’, ya ga bay rog,

ma ayuw ni ga be tay ngog e bay i pi’ e felfelan’ ngog ndariy n’umngin nap’an.