1 A SOMOL, mmotoyil ko wenig rog ni gu be ning e tin nib mat’aw;

mu telim ngog ko man’ ayuw ni gu be tay!

Motoyil ko meybil rog nri gub yul’yul’ ngay.

2 Ya go’ gur e rayag ni mog ni bfel’ e rog,

ni bochan e go’ gur e ga ma guy e tin rriyul’.

3 Ga manang lanin’ug.

Kamub ngog nnep’;

ka mu sikeng nigeg ni polo’

ma dam pir’eg ba ar ar ni kireb u fithik’ag.

Da gur ma yog ban’en nib kireb,

4 ni bod nma rin’ boch e girdi’;

ma gu ma fol ko motochiyel rom

ma dagur lek kanowa’en e pi’in yargal.

5 Gubin ngiyal ni gu ma yan u kanawo’em,

ma dawor gu chef riy nga orel bingyal’.

6 A Got, gu be meybil ngom, ya ga ma fulweg taban e meybil rog;

ere mu sap ngog ngam rung’ag e thin rog.

7 Mu dag fel’ngin e t’ufeg rom ma ga yororiyeg;

ra gu bay u chirem ma dariy ban’en nrayag ni rin’ e to’ogor rog ngog.

8 Mu ayuwegneg ni bod ni ga ma ayuweg e tir u marwam;

mmithaggeg ko taglul’ u tan pom,

9 ko pi cham ni be yib rok e pi’in kireb.

Pi to’ogor nib tathang e pogofan e kar liyegedgag;

10 dariy e marunguy rorad, mab tolang e thin rorad.

11 Kar chalngobiyedgag e chiney, u gubin yang ni gu ra cheal ngay,

ni yad be changarnag rogon ni ngar girngiyedgag nga but’.

12 Yad bod bogi layon, ni yad be son nigeg,

ni yad ba’adag ni ngar popofedgag ni nochyang.

13 SOMOL, moy! Mu cham ko pi to’ogor rog ngam gel ngorad!

Mu aywegeg ko saydon rom u pa’ e pi’in kireb;

14 mu ayuwegneg u pa’ e pi’in nib yoor ban’en rograd ko biney e tamilang.

Mu gechig nagrad ko pi gafgow ni ka mu cha’riy ni fan ngorad;

mang e yugu ra gaman gad pifakrad riy

miki aw boch ni fen pifak pifakrad!

15 Machane gag, e gu ra guy owchem, ni bochan e kug yal’uw;

ma nap’an ni gu ra od, ma ga bay, ni gin gabay riy e ra sugyeg ko felfelan’.