Salmos 3

Meybil ko Ayuw ni Kadbul

1 SOMOL, rib yo’or e to’ogor rog,

nike pag urngrad ni yad be togopluw ngog.

2 Yad be yogneg ni yad be ga’ar,

"Dabi ayuweg Got e cha’nem."

3 Machane gur SOMOL, e rungrung rog ko riya’ ni gubin ngiyal’;

ga ma gel nigeg

ma ga ma fulweg e athamgil nga lanin’ug.

4 Gu yornag e ayuw ngak SOMOL,

me fulweg taban e meybil rog ko fare burey rok nib thothup.

5 Gu pageg nga but’ ni nggu mol,

ma SOMOL e be yoror rog ni n’umngin e nep’.

6 Da gu rus ko yu biyu’ i to’ogor

ni yad ba liyegeg u ga’ngin yang.