Salmos 32

Puwofay nge n’ag fan e denen

1 Ba felan’ e cha’ nike n’ag Got fan e denen rok,

ni kireb rok e ke thang Got.✝32:1 32:1,2 Rom 4:7–8

2 Ba felan’ e en ndakir yog SOMOL ngak ni be rin’ e kireb;

ma kar waergow urngin mit e sabanban.

3 Ngiyal’ ni ndawor gu weliy e denen rog ngak SOMOL

e m’ay gelngig ni bochan e meyor ni ug tay ni kadbul nge nep’.

4 Ya mu gechig nigeg ni rran nge nep’, I gur SOMOL;

mu gu par ni kari m’ay gelngig,

ni bod e wa’angachal ni mlik’nag e yal’ u ngal’an e gowel.

5 Ma aram mu gu weliy e denen rog ngom;

da gu mithag rom e tin kireb ni ku gu rin’.

Gu turguy u wun’ug ni nggu weliy e pi denen rog ngom,

ma ga n’ag fan urngin e kireb rog.

6 Ere urngin e girdi’ rom nib yul’yul’ ngom e thi’ngar ra meybilgad ngom ko ngiyal’ ni kari t’uf e ayuw rorad;

ra yib e gafgow ni bod e ran nga daken e binaw nib machreg,

ma dabi taw ngorad.