1 Gu son gu sonnag e ayuw rok SOMOL;

me motoyil ngog me rung’ag lamag ni gu be wenig ngak ni nge ayuwegneg.

2 Me girngiyeg ngalang nggu chuw u lan ba low u thathren e riya’,

nib low u fithik’ e rungdu’!

Nge teg nga daken ba war nggu par ndabki buch ban’en rog.

3 Me fil ba tang nib be’ech ngog,

nib tang ni yibe pining e magaer ngak e Got rodad.

Pire’ e girdi’ ni bay ra guyed e ren’ey me yib madgun SOMOL u wun’rad

me par ni SOMOL e yad be toer ngak.

4 Ba felfelan’ e en ni SOMOL e be toer ngak,

ma dar cheal nge toer ngak e pi liyos,

ara un ko meybil rok e pi’in yad ma tayfan e pi got ni go’ bogi ban’en.

5 SOMOL ni Got rog, pire’ ban’en ni yira ngat ngay ni kam ngongliy ni fan ngomad;

dariy be’ ni bod gur!

Bo’or ban’en ni bfel’ nike m’ay i leamnag rom ni fan ngomad.

Dabyag ni gu ra weliy ni gubin,

ya kayigi pire’.

6 Gathi gamanman ni maligach nge pin’en ni yima pi’ ngom e ir e ga ba’adag;

fa gamanman ni ka ni urfiy nib polo u daken e altar,

ara pi maligach ni nge chuweg e denen.

Ya ka mu pi’ telig ni nggu rung’ag e thin rom ngay,

7 ere kug fulweg nike lungug, "Gub aray;

tin kamog ni nggu rin e bay u lan e babyor ko Motochiyel rom.

8 Got rog, ri gu ba’adag ni nggu rin’ e tin nib m’agan’um ngay!

Thin rom e be par u fithik’ i lanin’ug."

9 SOMOL, kugog fare bugithin ni bfel’ ni murung’agem ni gur e mmat’aw nagmad ngom,

ni kug weliy u lan e mu’ulung rok urngin e tirom e girdi’.

Ga manang ndab gu tal i weliy.

10 Murung’agem nrayag ni ngam mat’awnag e girdi’ ngom e dagu tay rog ni go’ gag e nggu nang;

gubin ngiyal’ ni gu ma weliy fanam yul’yul’ nge ayuw ni gama pi’.

Dawor gu th’ab gulungag u lan e mu’ulung rok urngin e girdi’ rom

ni gu be weliy murung’agen fanam yul’yul’ nge t’ufeg rom ni dabimus.

11 SOMOL, gu manang ndabiyag ni ngam tal ni nge dab kum runguyeg!

Gelngin nib t’uf e girdi’ rom nge fanam yul’yul’ e bay i yororiyeg ni gubin ngiyal’.

12 Kug par nga fithik’ e oloboch ni pire’,

ndabkiyag i the’eg!

Denen rog e ke ingeg,

da ku gur guy ban’en;

ke pire’ nga piyan lolugeg,

ma kug par nike mulan’ug.

13 SOMOL, mu ayuwegneg e chiney! Mu chuwegeg u fithik’!

14 Mang e yigi par e pi’in yad be guy rogon ni ngar thanged e fan rog

ni ka ra waergad ma ke wagagey lanin’rad!

Mang e yigi par e pi’in ni kar felan’gad ni bochan e pi oloboch nike yib ngog

ngar sulod nike m’ayfarad!