1 A Got, nge wurngan’um ngog, ma ga runguyeg,

ya kugub ngom ni nggu naf nga tan pa’am.

taglul’ u tan pom e kug naf ngay

nge taw ko ngiyal’ nike m’ay e yoko’.

2 Gu be pining Got, ni ir e ba Th’abi Tolang,

Got nma pi’ urngin e tin bt’uf rog.

3 Ra fulweg lungug u tharmiy me ayuwegneg;

bayi mo’waernag e pi’in yad be gafgow nigeg.

Got e ra dag ngog e t’ufeg rok ni dabi mus nge feni yul’yul’.

4 Ke liyegeg e pi to’ogor,

ni yad bod e layon nib talonguy e girdi’.

Nguwelrad e bod bogi sarey nge gan e gat’ing;

ma bolowtherad e bod yungi saydon nib m’uth.

5 A Got, mu dag fanam gel u lane lang,

nge fal’ngim u gubin yang u fayleng.

6 Ke pag e pi to’ogor rog bangi nug ni nggu aw ngay;

kari paraw lanin’ug.

Ka ra kired ba low u lane kanawo’ rog,

machane yad e kar mulgad nga langgin.

7 A Got, rib pagan’ug ngom;

Bay gu tang nggu pining e sorok ngom!

8 Lanin’ug mu od!

Talin e musik rog ni harp nge lyre mu odgow!

Bay gu pug e yal’ nge od.

9 Somol, bay gu pining e magaer ngom u fithik’ e pi nam.

Bay gu pining e sorok ngom u fithik’ e girdi’.

10 T’ufeg rom ni dabimus e ke dead ko tharmiy;

ma fanam yul’yul’ e ke tun ngalan e lang.

11 A Got, mu dag fanam gel u lane lang;

nge fal’ngim u polo’ e fayleng.