1 Gu yor nib ga’ lamag ngak Got;

gu yor nib ga’ lungug me rung’ag lamag.

2 Gu meybil ngak Somol ko ngiyal’ nike yib e gafgow ngog;

polo’ e nep’ ni gu meybil ni kug tining pa’ag ngalang,

machane, de fel’ lanin’ug.

3 Nap’an ni gu ra leamnag Got, mug gel’gel’;

nap’an ni gu ra pi’ lanin’ug, me mulan’ug.

4 I teg nda gu mol ni polo’ e nep’;

kari magafan’ug ndakiyag ni gu non.

5 Gu leamnag e pi rran nike thumur

me yib ngan’ug fapi duw kakrom.

6 N’umngin e nep’ ni u gu leam;

ug leam leam, ma ba’aray e n’en ni gu fitheg riy:

7 "Gur, gubin ngiyal’ ni bay i par SOMOL nike pi’ keru’ ngodad?

Gur, aram e ri dab ku da fel’gad u laniyan’ bayay?

8 Gur, aram e ke tal ni dabki t’ufegdad?

Gur, aram e ke m’ayfan e n’en ni micheg nra rin’?

9 Gur, ke pag Got talin ni nge runguydad?

Gur, damumuw e ke yon’ luwan e runguy rok?"

10 Ma aram me lungug, "N’en ni ka ri kireban’ug ngay

e Got e daki gel gelngin."

11 SOMOL, bay i yib ngan’ug e pi gafarig rom ni bfel’;

bay ug leamnag e pi ma’ang’ag ni um rin’ kakrom.

12 Bay gu leamnag murung’agen urngin e tin kam rin’;

bay gu par ma gu be tafinaynag urngin e tin kam rin’ nrib th’abi fel’.

13 A Got, gubin ni ga be rin’ ma ba thothup.

Dariy reb e got ni bod feni sorom.

14 Gur e Got ni ga ma ngongliy e maang’ang;

kam dag gelngim u fithik’ e pi nam.

15 Gelngim nib gel e mu ayweg e girdi’ rom ngay,

ni pi’in owchen Jakob nge Josef.

16 A Got, nap’an ni guyem e day me rus,

me durru’ t’ay e regur.

17 Yungi manileng e pu’og e ran nga but’;

me chublingan e derra’ u lane lang,

me mat e uluch u gubin i yang.

18 Lingan e dirra’ rom e malay nga but’,

ma ram’en e uluch ni be matmat e gal’ e fayleng;

me t’on nge rur e fayleng.

19 Ga ma yan u fithik’ e n’ew,

ngam th’ab nga barba’ e regur,

machane, luwan em e dab ni guy.

20 Ga be gafaliy e girdi’ rom ni bod ba tagafaliy e saf,

ni Moses nge Aron e ga’ rorad.