Salmos 84

Tawrengnag e naun rok Got

1 SOMOL ni Gubin ma Rayag Rok, ri ba t’uf e Tempel rom rog!

2 Kari gum’ ni bochan ni ngub ngaram!

Kari gum’ ni bochan ni ngu’un ngalan e yoror rok SOMOL.

Polo i gag ni gu be tangnag e felfelan’

ngak fare Got ni be par ni bafos.

3 Mus ko arche’ ni sparrow ni yad ma toy taferad,

ma arche’ ni swallow e bay taferad;

yad ma tay pifakrad nib chugur ko pi altar rom,

I gur SOMOL ni Gubin ma Rayag Rom, ni pilung rog ma Got rog.

4 Rib felfelan’ e pi’in yad be par u lan e Tempel rom,

ni gubin ngiyal’ ni yad be yin’ tangin e sorok ngom!

5 Rib felfelan’ e pi’in gelngirad e gur e be yib rom,

ma ba pasigan’rad ngay ni ngar milekaggad ngarbad ko burey ni Zion.

6 Ma yad ra yan u lan e loway nu Baka nib mlik’,

me ngal’ ni bang i ban’en ni bay e ran ni alublub riy,

som’on ko n’uw nma aw e ma sugnag yu yang riy ko ran.

7 Ra yad be yan ma yad be gel i yan,

bay ra guyed fare Got ni ir e th’abi ga’ u fithik’ e pi got u Zion!

8 SOMOL ni Got ni Gubin ma Rayag Rom, mu rung’ag e meybil rog;

Got rok Jakob, mu telim ngog!

9 A Got, mu ayuweg e pilung romad,

ni fare pilung ni gur e mturguy ni nge pilung!

10 Ta’reb e rran ni yira par u Tempel rom

ma kabfel’ nga bbiyu’ e rran nni par u bang;

kug ba’adag ni nggu sak’iy u langan e garog ko naun rok e Got rog

ko bin ni nggu par u tafen e girdi’ ni kireb.

11 I SOMOL e ir e yoror rodad, me ir ba pilung nib maluplup,

ir e ma tow’ath nagdad ko runguy nge tayfan.

Der ma siyeg ban’en ni bfel’

ni nge pi’ ngak e pi’in yad be rin’ e n’en nib mat’aw.

12 SOMOL ni Gubin ma Rayag Rom, rib felfelan’ e pi’in gur e ke lagan’rad ngom!