Salmos 99

Got ni ir e Pilung Nib Th’abi Tolang

1 I SOMOL e pilung, ma be t’on e girdi’.

Ke par nga tagil’ nib pilung ngalang ko kerubim,

me durru’ e fayleng.

2 I SOMOL e rib gel gelngin u lan yu Zion;

ir e ba tolang u fithik’ urngin e pi nam.

3 Gubin e girdi’ ni bayi pining e sorok nga fithingan nib rir ma ba gilbugwan.

Ir e ba thothup!

4 Pilung nib gel, bt’uf rom e tin nib mat’aw;

kam sunmiy e tin nib mat’aw u lan yu Israel;

kam fek i yib e tin nib mat’aw ma ba yal’uw.

5 Ke sorok SOMOL ni Got rodad;

mu siro’gad u puluwon tagil’ nib pilung!

Ir e ba thothup!

6 Moses nge Aron e yow e prist rok,

me Samuel e be’ ni i meybil ngak;

ra pininged SOMOL, me fulweg lungurad.

7 I non ngorad u fithik’ fare gi manileng nib k’iy ngalang;

miyad fol ko pi motochiyel rok nge tin ni ta’chiylen ngorad.

8 SOMOL ni Got romad, gur e mu fulweg lungun e girdi’ rom;

mu dag ngorad ni gur ba Got ni ga man’ag fan e kireb uwun’um

ni yug aram rogon ni mu gechig nagrad ko pi denen rorad.

9 Mu pininged e sorok ngak SOMOL ni Got rodad,

mi gimed liyor ngak ko fare burey rok nib thothup!*99:9 BUREY ROK NIB THOTHUP: ku arrogon ni bay 2:6.

I SOMOL ni Got rodad e ba thothup.