1 जिस बखत यिर्मयाह पहरे कै आँगण म्ह बन्द था, उस बखत यहोवा का वचन दुसरी बार उसकै धोरै पोहच्या, 2 "यहोवा जो धरती का रचणआळा सै, जो उस नै स्थिर करै सै, उसका नाम यहोवा सै; यहोवा न्यू कहवै सै, 3 मेरे तै प्रार्थना कर अर मै तेरी सुणकै तेरे ताहीं बड़ी-बड़ी अर मुश्किल बात बताऊँगा जिननै तू इब्बे न्ही समझदा। 4 क्यूँके इस्राएल का परमेसवर यहोवा इस नगर के घरां अर यहूदा के राजयां के भवनां कै बारै म्ह, जो इस करकै गिराए जावै सैं के मोर्चाबन्‍दी अर तलवार के गैल सुभीते तै लड़ सकै, न्यू कहवै सै, 5 कसदियाँ तै युद्ध करण नै वे माणस आवै तो सैं, पर मै छो अर जळजळाहट म्ह आकै उननै मरवाऊँगा अर उनकी लाश उसी जगहां म्ह भर देऊँगा; क्यूँके उनकी बुराई कै कारण मन्‍नै इस नगर तै मुँह फेर लिया सै। 6 देख, मै इस नगर का ईलाज करकै इसके बासिन्दया नै चंगा करुँगा; अर उनपै पूरी शान्ति अर सच्‍चाई प्रगट करुँगा। 7 मै यहूदा अर इस्राएल के कैदियाँ ताहीं बोहड़ा ले आऊँगा, अर उननै पैहले की तरियां बसाऊँगा। 8 मै उननै उनके सारे अधर्म अर पाप के काम तै शुद्ध करुँगा जो उननै मेरे खिलाफ करे सैं; अर उननै जितने अधर्म अर अपराध के काम मेरे खिलाफ करे सैं, उन सारया ताहीं मै माफ करुँगा। 9 क्यूँके वे वो सारे भलाई के काम सुणैगें जो मै उनके खात्तर करुँगा अर वे सारे कल्याण अर शान्ति की जिक्र सुणकै जो मै उनतै करुँगा, डरैगें अर थरथरावैंगे*; वे धरती की उन जात्तां की नजर म्ह मेरे खात्तर खुशी अर स्तुति अर शोभा का कारण हो जावैंगे।"

10 "यहोवा न्यू कहवै सै, या जगहां जिसके बारै थम कहो सो ‘या तो उजाड़ होगी सै, इस म्ह ना तो माणस रहग्या सै अर ना पशु,’ यानिके यहूदा देश के नगर अर यरुशलेम की सड़क जो इसी सुनसान पड़ी सैं के उन म्ह ना तो कोए माणस रहवै सै अर ना कोए पशु, 11 इन्हे म्ह खुशी अर आनन्द का शब्द, बन्दड़ा-बन्दड़ी के शब्द, अर इस बात के कहण आळयां का शब्द फेर सुणाई पड़ैगा: ‘सेनाओं के यहोवा का धन्यवाद करो, क्यूँके यहोवा भला सै, अर उसकी करुणा सदा की सै!’ अर यहोवा के भवन म्ह धन्यवाद-बलि ल्याण आळयां का भी शब्द सुणाई देवैगा; क्यूँके मै इस देश की हालत पैहले की तरियां ज्यों की त्यों कर देऊँगा, यहोवा का योए वचन सै।"

12 "सेनाओं का यहोवा कहवै सै: सारे गाम्मां समेत या जगहां जो इसी उजाड़ सै के इस म्ह ना तो माणस रहग्या सै अर ना पशु, इस्से म्ह भेड़-बकरी बिठाण आळे पाळी फेर बसैंगे। 13 पहाड़ी देश म्ह अर नीच्‍चै के देश म्ह, दक्षिण देश के नगरां म्ह, बिन्‍यामीन क्षेत्र म्ह, अर यरुशलेम के लोवै-धोवै, यानिके यहूदा देश के सारे नगरां म्ह भेड़-बकरी फेर गिण-गिणकै चराई जावैंगी, यहोवा का योए वचन सै।"

14 "यहोवा की या भी वाणी सै, देख, इसे दिन आण आळे सैं के कल्याण का जो वचन मन्‍नै इस्राएल अर यहूदा के घरान्यां कै बारै म्ह कह्या सै, उसनै पूरा करुँगा। 15 उन दिनां म्ह अर उस बखत म्ह, मै दाऊद के वंश म्ह धार्मिकता की एक डाल लगाऊँगा*; अर वो इस देश म्ह न्याय अर धार्मिकता के काम करैगा।* 16 उन दिनां म्ह यहूदा बच्या रहवैगा अर यरुशलेम निडर बस्या रहवैगा; अर उसका नाम यो धरया जावैगा यानिके ‘यहोवा म्हारी धार्मिकता।’"

17 "यहोवा न्यू कहवै सै, दाऊद के कुल म्ह इस्राएल के घराने की गद्दी पै विराजण आळे सदा बणे रहवैंगे, 18 अर लेवीय याजकां के कुलां म्ह हर दिन मेरे खात्तर होमबलि चढ़ाणआळे अर अन्‍नबलि जळाण आळे अर मेलबलि चढ़ाणआळे सदा बणे रहवैंगे।"

19 फेर यहोवा का यो वचन यिर्मयाह के धोरै पोहच्या 20 "यहोवा न्यू कहवै सै: मन्‍नै दिन अर रात कै बारै म्ह जो करार करया सै, जिब थम उसनै इसा तोड़ सको के दिन अर रात अपणे-अपणे बखत म्ह ना हों, 21 फेर ए जो करार मन्‍नै अपणे दास दाऊद कै साथ करया सै टूट सकैगा, के तेरे वंश की गद्दी पै विराजण आळे सदा बणे रहवैंगे, अर मेरा करार मेरी सेवा टहल करण आळे लेवीय याजकां कै साथ करया रहवैगा। 22 जिसा अकास की सेना की अर समुन्दर के रेत के कणा की गिणती न्ही हो सकै सै उसी तरियां मै अपणे दास दाऊद के वंश अर अपणे सेवक लेवियाँ नै बढ़ाकै अनगिणत कर देऊँगा।"

23 यहोवा का यो वचन यिर्मयाह के धोरै पोहच्या 24 "के तन्‍नै न्ही देख्या के ये माणस के कहवै सैं, ‘जो दो कुल* यहोवा नै चुण लिए थे उन दोनुवां तै उसनै इब हाथ ठाया सै’? यो कहकै के ये मेरी प्रजा नै निकम्मा जाणै सैं अर के या जात्ति उनकी नजर म्ह गिरगी सै। 25 यहोवा न्यू कहवै सै, जै दिन अर रात कै बारै म्ह मेरा करार अटल ना रहवै, अर जै अकास अर धरती के नियम* मेरे ठहराए होए ना रह जावै, 26 फेर ए मै याकूब के वंश तै हाथ ठाऊँगा। अर अब्राहम, इसहाक अर याकूब के वंश पै प्रभुता करण कै खात्तर अपणे दास दाऊद के वंश म्ह तै किसी ताहीं फेर ना ठहराऊँगा। फेर भी इसके उल्ट मै उनपै दया करकै उननै गुलाम्मी तै बोहड़ा ल्याऊँगा।"