1 आसे माणूं बऊत कमजोर ए।

आसे थोड़े जे बखतो रिया तँईं जिऊँए, ओर आसे बऊत परेशानिया रा अनुभव करूँए।

2 से फूलो जेड़ा खिलोआ, फेर तोड़ेया जाओआ;

से छांयी जेड़ा टल़ी जाओआ ओर केथी ठईरी नि सकदा।

3 प्रभु, क्या तूँ एड़े माणूंए पाँदे नजर लगाएया?

क्या तूँ माखे आपू साथे कचैरिया रे खड़ा करेया?

4 एड़ा कदी पनि ऊई सकदा

कि आसा जेड़ेया अशुद्ध माणूंआ ते कुछ शुद्ध निकल़ी सको।

5 माणूंआ रिया जिन्दगिया रे दिन गिणी की ठराई राखे,

ओर तेसरी उम्रा रे मीन्नेया री गिणती तांगे लिखी री ए

ओर तैं तेसखे एड़ा बन्ना लगाई राखेया, जेतेखे से पार नि करी सकदा।

6 ओ प्रभु, तेस पाँदा ते आपणी नजर टाई लओ,

ताकि से एक मजदूरो जेड़ा आपणा दिनो रा काम पूरा करी की राम करी सको।

7 डाल़ो खे तो उम्मीद रओई

कि चाए तेसखे बाडी बी देओ, तेबे बी

फेर पलँगूर आऊणे ओर तिजी ते नरम-नरम डाल़िया निकल़दिया ई रणियां।

8 चाए तेसरी जड़ जमीना दे पुराणी बी ऊई जाओ

ओर तिजी रा ठूँठ माट्टिया दे सूकी बी जाओ,

9 तेबे बी बरखा रे पाणिए साथे से फेर जमणा

ओर पौधे जेड़िया तेते ते पाँगटिया आऊणियां।

10 पर जेबे लोक मरने लगी रओए तो बऊत कमजोर ऊई जाओए।

फेर सेयो मरी जाओए ओर सेयो फेर कदी पनि जिऊई सकदे।

11 आसे फेर एड़िया सूकिया नदिया ओर सूके

तलाबो जेड़े ओए जिदे पाणिये री एक बूँद पनि ऊँदी।

12 जेबे माणूं मरी जाओए ओर सेयो फेर कदी पनि उठणे।

जदो तक सर्ग तरतिया पाँदे रणा

तदुए तक सेयो नि जागणे।

13 ओ प्रभु, काश! तूँ माखे मरे उए लोका रिया दुनिया दे लकोई देंदा

ओर तदुओ तक लकोई की राखदा, जदुओ तक तेरा गुस्सा शान्त नि ऊई जांदा,

ओर मेरिया तँईं बखत ठराई की तेबे मेरी सम्माल़ लंदा।

14 माणूं क्या मरी की फेर जिऊँदे ऊई सकोए?

पर मां तेस बखतो रा इन्तजार करदे रणा

जेस बखते मेरी बिपत्ति खत्म ऊणी।

15 तूँ माखे बुलांदा ओर आऊँ बोलदा;

ता तेस माणूंए री इच्छा करनी जो तैं बणाई राखेया।

16 तेबे तुसा मेरा हर एक कदम देखणा,

पर तुसा मेरेया पापा पाँदे नजर नि राखणी।

17 तां माखे माफ करी देणा ओर मेरे पाप मांते दूर करी देणे,

तां मेरे सारे पाप-दोष साफ करी देणे।

18 ओर पाह्ड़ बी टूटी की नाश ऊई जाओआ

ओर चट्टान आपणियां जगा ते अटी जाओई।

19 जिंयाँ पात्थर पाणिए साथे किसी जाओए

ओर जमीना री तूड़ पाणिए री बाढ़ा रे बह्यी जाओई;

तिंयाँ ई, ओ प्रभु, तूँ माणूंए री उम्मीदा माट्टिया दे मलाई देया।

20 तूँ सदा आसा खे अराए आ, ओर फेर आसे मरी जाऊँए।

म्हारे मरने ते बाद तूँ म्हारे चेहरे खे खराब करी देया, ओर तूँ आसा खे पेजी देया।

21 तेसरे मरने ते बाद से नि जाणदा कि तेसरे माठेया री बढ़ोतरी ऊई कि नई।

ना ई से जाणोआ कि क्या तिने आपणा जीवन बर्बाद कित्तेया ए।

22 बस आपणियां बजा तेई तेसखे आपणे शरीरो रा दु:ख महसूस ओआ

ओर आपणियां बजा तेई तेसरा प्राण पीतरे ई पीतरे दु:खी ऊँदा रओआ।