1 आका पाई की देखी लओ, अय्यूब! देख कि क्या कोई ज्वाब देओआ।

क्या कोई स्वर्गदूत ए जेसरिया तरफा खे तूँ मुड़ी सकेया?

2 कऊँकि मूर्ख तो गुस्सा करदे-करदे नाश ऊई जाओआ,

ओर निर्बुद्धि माणूं ईर्ष्या करने रिया बजा ते मरी जाओआ।

3 मैं मूर्ख माणूं सफल ऊँदे ऊए देखी राखेया,

पर तिना खे अचाणक स्राप लगोआ, फेर सेयो पुरिया तरआ ते बर्बाद ऊई जाओए।

4 तेसरे बच्चे उद्धारो ते दूर ए

ओर सेयो कचैरिया दे नाश कित्ते जाओए

ओर तिना खे बचाणे वाल़ा कोई नि ऊँदा।

5 लाल़ची ओर पूखे लोक मूर्खो रे

कांडेया वाल़े बाड़ो रे डोरूए री फसला दे बी कब्जा करी लओए,

ओर तिना री सारी तअन-दौलता खे लूटी लओए।

6 बिपदा तूड़ा ते नि पैदा ऊँदिया

ओर ना पाप जमीना ते जम्मोआ,

7 पर जिंयाँ चिलू पाँदिए-पाँदिए उडी जाओए,

तिंयाँ ई माणूं कष्ट पुगतणे रिया तँईं पैदा ऊईरा।

8 अय्यूब, जे तेरिया जगा पाँदे आऊँ ऊँदा, तो आऊँ परमेशरो रिया तरफा खे मुड़दा

ओर आपणे मकद्दमे खे परमेशरो पाँदे छाडी देंदा।

9 कऊँकि परमेशर ई एड़े बड़े-बड़े काम करोआ जिना खे समजी नि सकदे

ओर इतणे अचम्बे रे काम करोआ, जिना खे गिणी नि सकदे।

10 परमेशर तरतिया पाँदे बरखा करोआ

ओर डोरूआ खे बी सिंजोआ।

11 आ, से परमेशर ए जो रूड़े रे लोका खे बचाओआ

ओर शोग करने वाल़े लोका खे

आनन्द देओआ।*

12 से चलाक लोका रिया इच्छा बेकार करी देओआ

ओर तिना रे आथे कुछ बी सफल नि ऊँदा।

13 परमेशर अक्लमंद माणूंए खे तिना री मूर्खता रेई फसाई देओआ

ओर टेडी चाल चलणे वाल़े लोका री योजना चट ई असफल ऊई जाओई।*

14 सेयो दिने न्हेरा महसूस करोए ओर

दिन-दपैरे सेयो राती जेड़े तोपदे रओए।

15 पर परमेशर गरीबा खे मरने ते बचाओआ,

दुष्ट लोका खे से तिना खे दु:ख देणे नि देंदा।

16 तेबेई तो गरीबा खे उम्मीद ओई

ओर टेडी चाल चलणे वाल़े माणूंए रा मूँ बन्द ऊई जाओआ।

17 देख, से माणूं बऊत ई भाग्यशाली ए,

जेसखे परमेशर ताड़ना देओआ,

इजी खे ओ अय्यूब, तूँ सर्वशक्तिमान परमेशरो री ताड़ना खे मानी लओ।

18 जबकि सेई काईल करोआ ओर सेई जख्मा दे पट्टी बानोआ,

सेई काओआ ओर सेई आपणे आथो साथे बमारो खे ठीक बी करोआ।

19 तेस तुसे कई बार तुसा रे कष्टा ते छुड़ाणे,

जेतेरिया बजा ते तुसा साथे कुछ बी बुरा नि ऊणा।

20 अकाल़ो रे बखते तेस तूँ मौता ते ओर युद्धो दे

तलवारी ते मरने ते बचाणा।

21 जेबे लोका तेरी बेजती करनी तेबे परमेशरो तेरी रक्षा करनी;

जेबे तेरे नेड़े-तेड़े बऊत सारिया चीजा खत्म ऊणिया तेबे तूँ डरना नि।

22 तूँ विनाश ओर अकाल़ो रे बखते आसदा रणा,

ओर ताखे तरतिया रे केसी बी बणो रे डांगरा ते डर नि लगणा।

23 बल्कि तेरे डोरूआ दे फसल बांदे बखते पात्थर नि निकल़णे,

ना जंगल़ी जानवर ताखे नुकशाण पऊँचाणे आऊणे।

24 इजी बजा ते तूँ आपणे कअरे सई-सलामत रणा। ओर

जेबे तूँ आपणे कअरो खे देखेगा,

तेबे कोई चीज राची री नि ऊणी।

25 तां ए बी जाणी लणा कि तेरा वंश बढ़ने लगी रा,

ओर तेरा वंश तरतिया रे काओ रे तिनखेया जेड़ा अणगिणत ऊणा।

26 जिंयाँ नज्ज पाकणे पाँदे नज्जो रे पूल़ेया रा टेर बखतो पाँदे खल्याणो रे राखेया जाओआ,

तिंयाँ ई तूँ पुरिया उम्रा रा ऊई की मरना ओर कब्रा रे पऊँचाया जाणा।

27 देख, आसे ये ज्ञान बऊत ई टोल़ी-टोल़ी की पाई राखेया;

इजी खे तूँ सुण ओर आपणियां पलाईया रिया तँईं त्यानो रे राख।