अय्यूब 3

अय्यूब अपने ज़र्म दिहैड़ी जो फिटकार देते

1 तैसेरां बाद अय्यूब अपनु आशी खोलतां एपनी ज़र्मनेरे दिहैड़ी पुड़ लानत केरने लगो।

2 ते तै ज़ोने लगो,

3 "तै दिहाड़ी नाश भोए, ज़ैस दिहाड़े मेरू ज़र्म भोवं,

ते तै रात ज़ैस मां ज़ोने लगे, ‘कि मट्ठू गर्भे मां अऊं।’

4 तै दिहाड़ी आंधरी भोए,

सुर्गे मरां परमेशर तैस याद न केरे,

ते न तैस मां लौ भोए।

5 आंधरू ते मौतरो सैयो तैस पुड़ राए,

बिदलार तैस पुड़ टिकोरी राए,

ते दीसां आंधरू बनाने बैली चीज़ां तैस डरैती रान।

6 बड़ू आंधरू तैस राती ट्लाए,

ते झ़ेड़रे दिहाड़न मां तै खुशी न मनेई बटे,

ते न महीन्न मां तैसेरी गिनती की गाए।

7 शुना, तैस राती बच्‍चे न ज़र्मन,

तैस मां खुशरे गीतां केरि आवाज़ न शुनोए।

8 ज़ैना मैन्हु कोन्ची दिहाड़े पुड़ लानत देतन, तैस दिहैड़ी पुड़ भी लानत देन,

ते तैना भी ज़ैना लिव्यातानेरो*3:8 लिव्यातानेरो मगरमच्छां शिकार केरनो चातन।

9 तैसेरे झ़ेझ़ां गुरगुमेरे तारे लौ न देन,

तै दीसरी लौई बलगे पन तै तैस न मैल्हे,

तै न झ़ेझ़री किरणन लेही बटे।

10 किजोकि तैसां मेरी अम्मरू गर्भ बन्द न कियूं

ते तकलीफ मेरे एछ़्छ़न करां न छ़ुपाई।

11 अवं अम्मरे पेटे मां किजो नईं मरोरो?

ज़र्मते बार मेरी केंयां कि नईं निसोरी?

12 अवं कुम्मे मां किजो ट्लाव?

ते मीं अम्मरू दुद्ध किजो पियूं?

13 एरू न भोथू त अवं च़ुपच़ाप पेवरो राथो,

अवं झ़ुल्‍लोरो*3:13 झ़ुल्‍लोरो मतलब मरनू राथो ते आराम केरेथो

14 ते अवं दुनियारे तैन राज़न ते सलाहकारन सेइं साथी भोथो,

ज़ैनेईं अपने लेई कब्रां बनावेवरिन।

15 या अवं तैन हुकूमत केरनेबालां केरो ज़ेरो भोथो,

ज़ैन कां सोन्नू थियूं ज़ैनेईं अपना घरां चैंदी सेइं भरोरोरां थियां,

16 या अवं पेटे मां बड्डो भोने करां पेइलो मेरि जेवरो भोथो,

या एरे बच्‍चां केरो ज़ेरो भोथो ज़ैनेईं

लौ कधे न लेवरी भोए।

17 तैस हालती मां दुष्ट लोक कधे कोन्ची दुख न देन,

ते थकोरे हुटोरे आरामे सेइं रहतन।

18 तैस मां कैदी अकोट्ठे सुखे सेइं रहतन,

ते तैस मां मेहनत केरनेबालेरे सखत हुक्म भी न शुन्न।

19 तैस मां अमीर ते गरीब सब रहतन,

ते गुलाम अपने मालिके करां आज़ाद रहते।

20 दुखी लोकन लौ,

ते उदास मने बालन ज़िन्दगी किजो दित्ती गातीए?

21 तैना मौती बलगतन, पन तै एज्जे न;

ते दब्बोरे खज़ाने करां जादे तैस तोपतन;

22 तैना कब्री मां गानेरे बाद बड़े खुश ते आनन्दे सेइं मसत भोतन।

23 लौ तैस मैन्हु किजो मैलचे,

ज़ेसेरी बत छ़पोरीए,

ज़ेसेरे च़ेवरे पासन परमेशरे घेरो बन्धोरोए?

24 मीं त रोट्टी खानेरे बजाहे लम्मे-लम्मे ओशा एइतन,

ते मेरू करलानू गड्डरू ज़ेरू बगतू रहते।

25 किजोकि ज़ैस डरानेबैली गल्‍ली करां अवं डरताईं, तैए मीं पुड़ एइचे,

ते ज़ैस गल्‍ली करां अवं घबराताईं तैए मीं पुड़ एइतीए।

26 मीं त न चैन, न शान्ति, ते न आराम मैल्हे,

पन सिर्फ दुख मैलते।"