1 फिरी एक्सां यहोवा परमेशरेरे दूत तैसेरे सामने हाज़र भोए, ते तैन मां शैतान भी एइतां हाज़र भोव। 2 यहोवा, शैताने पुछ़ू "तू कोट्ठां एवरोस?" शैताने यहोवा जुवाब दित्तो, "धेरती पुड़ इरां-उरां हंठतो-फिरतो ते च़लतो-फिरतो एवरोईं।" 3 यहोवा, शैताने पुछ़ू, "कुन तीं मेरे दास अय्यूबे पुड़ ध्यान दित्तोरूए? किजोकि धेरती पुड़ तैसेरो ज़ेरो बेकसूर ते सच़्च़ो ते मेरो डर मन्ने बालो ते बुरैई करां दूर रानेबालो मैन्हु होरो कोई नईं? ते चाए तीं अवं बगैर वजां तैस नाश केरनेरे लेई उकसव, फिरी भी तै हुना तगर एपनी भलियाई पुड़ टिकोरो राहोरोए।" 4 शैताने यहोवा जुवाब दित्तो, "चेमड़रे बदले चमड़ी, पन जानरे बदले मैन्हु अपनु सब किछ देते। 5 पन तू सिर्फ तैसेरी हेड्डी ते मासे सेइं हुर, तैखन तै तेरे तुत्तरे पुड़ तेरी निन्दा केरेलो।" 6 तैखन यहोवा, शैताने सेइं ज़ोवं, "शुन, तै तेरे हथ्थे मांए, सिर्फ तैस जाना न मैरां।"

7 तैखन शैतान यहोवारे सामनेरां च़लो जेव, ते अय्यूब पव्वन करां लेइतां दोग्गे तगर बड्डे-बड्डे खराड़न सेइं दुखी कियो। 8 तैखन अय्यूबे काणी देनेरे लेई अक कपरी ट्लेइतां मांज़नी पुड़ बिश्शी जेव। 9 तैखन अय्यूबेरी कौन्श अय्यूबे जो ज़ोने लगी, "कुन हेजू भी तू परमेशरे पुड़ भरोसो केरने लगोरोस? अपने परमेशरेरी निन्दा केर, ते मेरि गा।"

10 अय्यूब तैस सेइं ज़ोने लगो, "तू बेवकूफ कौन्शां केरि ज़ेरि गल्‍लां केरने लगोरिस, कुन अस ज़ैना परमेशरेरे हथ्थे सेइं सुख नेतम, दुख न नेम?" एन सेभी गल्‍लन मां भी अय्यूबे ज़ोने मां कोई पाप न कियो। 11 ज़ैखन तेमान नगरेरो एलीपज, ते शूह नगरेरो बिल्दद, ते नामा नगरेरो सोपर, ज़ैना अय्यूबेरे ट्लाई दोस्त थिये, अय्यूबे पुड़ एवरी ऐह मुसीबत शुन्तां एप्पु मांमेइं ज़ोने लगे, च़ला अस अय्यूबे कां गेइतां तैस सेइं साथी शोग मनाम, ते तैस दिलासो देम, असां इट्ठां हुनी तैरां च़लम। 12 ज़ैखन तैनेईं दूरेरां तेकतां अय्यूब लाव त तैनेईं तै न पिशानो, तैखन तैना ज़ोरे सेइं चिन्डां लगे मारने, ते तैनेईं दुखेरे मारे अपना-अपना लिगड़ां छ़िन्दां, ते अम्बरेरे पासे धूड़ उडैरतां अपने दोग्गे पुड़ छ़डी। 13 तैसेरे बाद तैना सत दिहाड़े ते सत रातन तैस सेइं साथी तल्‍ले बिशतां शोग मनाते राए, पन तैसेरो एत्रो बड़ो दुख लेहितां कोन्ची भी तैस सेइं गल केरनेरी भी हिम्मत न अई।