Jó 5

1 "हक देइतां हेर; कुन कोई आहे कि ज़ै तीं जुवाब देलो?

तू पवित्रन*5:1 पवित्रन स्वर्गदूतन मरां केसेरे पासे फिरेलो?

2 किजोकि बेवकूफ जलन केरि-केरि नाश भोइ गाते,

ते बेअक्ल ज़लते-ज़लते मेरि गाते।

3 मीं बेवकूफ ज़ील छ़डतो लाहोरोए;

पन मीं अचानक तैसेरे घरे पुड़ लानत दित्ती।

4 तैसेरे बच्‍चे हिफाज़ती करां दूर आन,

ते तैना आदालती मां ढ्लेन्च़े गातन,

ते तैन कोई छुटानेबालो नईं।

5 नियन्ने लोक तैसेरे ऊडारां केरि फसल खातन,

बल्के कंटां केरे बाड़े मरां कढतन;

ते ट्लिशरो तैन केरे धनेरे लेई फंदो लाते।

6 किजोकि मुसीबत धूड़ी सेइं पैदा न भोए,

ते न तकलीफ ज़मीनी मरां उगे;

7 पन ज़ेन्च़रे च़िन्गां उबरे जो उडरतिन,

तेन्च़रे मैन्हु भी दुख भोगनेरे लेई पैदा भोवरोए।

8 पन अवं त परमेशरे तोपतो रेइलो,

ते अपनो मुकदमो तैस्से पुड़ छ़डेलो,

9 तै त एत्रां बड्डां कम्मां केरते ज़ैन केरू बियान न केरोए,

कने एत्रे चमत्कार केरते ज़ैन केरि गिनती न केरोए।

10 तै ज़मीनी पुड़ झ़ड़ी बखाते,

ते उडारन मां पानी भेज़ते।

11 एन्च़रे सेइं तै हलीम लोकन उच्‍ची ठारी पुड़ बिशालते,

ते मातम केरनेबाले लोकन उच्‍चे ठैरी

पुड़ पुज़ेइतां बच़ाते।

12 तै च़लाक लोकां केरे खियाल बेकार केरते,

ते तैन केरे हथ्थन सेइं किछ भी न बेनि सके।

13 परमेशर च़लाक लोकन तैन केरि च़लैकी मां फसाते,

ते खोट्टे लोकां केरि योजना दूर की गैतिन।

14 तैन पुड़ दीसां आंधरू पेई गाते,

ते भर दुपहरेईं तैना रातरे ज़ेरे टटोलते फिरतन।

15 पन गरीब लोकन तैन केरि ऐशेरी तलवारी

ते तैन ताकतबरां केरे हथ्थन करां बच़ाते।

16 एल्हेरेलेइ गरीब लोकन उमीद भोतीए,

ते खोट्टे मैन्हु केरू आशी बन्द भोइ गाते।

17 हेर, केत्रो धने तै मैन्हु, ज़ैस

परमेशर झ़िड़क देते;

एल्हेरेलेइ तू सर्वशक्तिमान परमेशरेरी निसीयत घटिया न समझ़।

18 तै ज़खमी केरते, पन पट्टी भी बन्धते;

तै बाते भी पन अपने हथ्थे सेइं बझ़ाते भी।

19 तै तीं शेइ आफतन करां बच़ालो;

बल्के सत्तन*5:19 सत्तन यानी सेभन सेइं भी तेरो कोई नुकसान न भोल्हो।

20 कालेरे साले मां तै तीं मौती करां ते जंगी मां भी

तीं तलवारारे धारी करां बच़ालो।

21 तू लोकां केरे बुरी गल्‍लन करां बच़ोरो रालो ते ज़ैखन विनाश एज्जे,

तैखन भी तीं डर न भोल्हो।

22 तू उज़ाड़नेरे ते कालेरे दिहाड़न मां खुश रालो,

ते तीं जंगली जानबरन करां डर न लग्गेलो।

23 बल्के उडारेरे घोड़ भी तीं सेइं करार केरतां राले,

ते जंगली जानबर भी तीं सेइं साथी मेल रख्खेले।

24 ते तीं पूरू याकीन भोल्हु, कि मेरो डेरो सुखे सेइं आहे,

ते ज़ैखन तू अपने घरे मां हेरस तैखन

कोई भी चीज़ हेरोरि न भोल्ही।

25 तीं ई भी पतो लग्गेलो, कि तेरू खानदान बड़ू भोल्हु,

ते तेरू खानदान ज़मीनरे घासेरू ज़ेरू भोल्हु।

26 ज़ेन्च़रे गेड्डी केरो ढेर खलाड़ी मां रख्खो गाते,

तू लम्मी उमर खेइतां ते मेरतां कब्री मां पुज़ेलो।

27 हेर, असन तोप्पी-तोप्पी एरू मैल्हू;

इस तू शुन, ते अपने फैइदेरे लेई ध्याने मां रख।"