Lucas 24

Vairi Vaienda kuEmausi

13 Pazuva rakarero vairi vavo vanga vachienda kumusha unoitiwa Emausi, huri yomamaera masere kubva kuJerusarema. 14 futi vadotaurirana zvinhu zvakarezvi zvese zvanga zvaitika. 15 Zvidoitika kuti pavaitaura daipo vachibvunzana, Jesu pachake adonyedza papfupi, ndokuenda navo. 16 Asi meso yavo yadoita buzvi ndokutadza kumuziva. 17 Adobva wati kwavari, "Hukurukurirana kworudzii kwamunoita muchitekaira daipa?" Vadobva vamira, vadosuwa. 18 Umwe wacho waiitiwa Khiropasi, adomupindura achiti, "Ndiwe wega nai murendo muJerusarema asingazive zvinhu zvidoitika mazuva yano?" 19 Iye adobva wati, "Zvinhu zvokuti chii?" Vadoti kwaari, "Zviri maererano naJesu woNazareta, wanga ari muporofiti anosimba pabasa nopashoko pamberi paMwari novanhu vese, 20 nomaperekehwo yaadoitiwa novaphirisita vedu vakuru novatongi kuti atongehwe ipfa, futi kuti aroverehwe. 21 Asi Tanga tichitogurupira kuti ndiye achadzikinura vaIzirairi. Futi pamusoro pozvakarezvi zvese, rino rava zuva rochitatu kubva pazvidoitika. 22 Ukuwo, vamwe vakadzi voboka redu vatishamisa, vanga vari kuguwa mambakwedza. 23 Havanai kuwana mutumbi wache. Vadzoka vachiti vaona chiratidzo chongirozi, ndokubva dzavanyepa kuti mupenyu. 24 Vabiyedu vatanga tinavo vaenda kuguwa, ndokuwana zvidoita sekutauhwa kwazvanga zvaitiwa novakadzi, asi iye havanai kumuona." 25 Adobva wati kwavari, "O varume madzemwa, muno mwoyo inochehwa kutenda zvese zvidorehwa novaporofiti! 26 Zvanga zvisinai kufanira chere kuti Khirisitu atambudzike zvidodai achidzopinda mukubhwinya kwache?" 27 Adothanga kubva pana Mozisi nokuvaporofiti vese, adovadudzira zvomumagwaro yese zviri maererano naye pachake. 28 Zvino vadosvika papfupi nomusha wavanga vachienda, Iye adoita kunge waakupindirira. 29 Ivo vadomurambidza kuenda vachiti, "Gara naisisu, ndava nguwa yaenda, zuva radoka." Saka adodzopinda kogara navo. 30 Zvino adodzogarikika navo kuti vaje, adotora mazingwa, ndokuropafadza, ndokukomora achibva wavapasa. 31 Meso yavo yadopengenuka, ndokubva vamuziva, iye adobva wanyangarika. 32 Vadonyairirana vachiti, "Sei mwoyo yedu isinai kutirimuka paanga achinyaira naisisu munzira, panguwa yaanga achitivhurira magwaro?" 33 Vadosumuka paawa yakareyo vachidzokera kuJerusarema, vadowana vano gumi nomubodzi vadoungana pabodzi novavanga vanavo, 34 ivo vadoti, "Ishe wamuka pachokwadi, futi wazviratidza kuna Simoni!" 35 Ipopo vadorondedzera zvanga zvaitika munzira, nomaziviro yavadomuita pakukomora zingwa.