Êxodo 3

Ibinọkpaabyi oyerẹ Mosẹs

1 K’ewu danẹ, Mosẹs od-okkerẹ arọkimaan p’Jẹtro kw’ode ọnyẹ kwẹ, obir ode ọfọhn-nja kw’ẹkọma ch’Midiyan. Otima arọkimaan mbo ozenga ochina z’ibyi s’ikem ebhira, za ch’anọng nna arukọ, z’Horẹb kw’ode egbe ch’Ibinọkpaabyi. 2 Ny’ekpondaak ch’eyinẹ ny’ottem kw’echi ch’ẹwọm-ọwọma, nya kw’ozeng-eden kw’Ọvaar Ibinọkpaabyi oyinẹ okebha Mosẹs. Mosẹs oze bẹ́, echi ndo ening nya ẹwọm ekpon, okenaka, ọttọhk kẹkwọmọ. 3 Minna kw’Mosẹs obenẹ bẹ́, "Kaam m’nzenga nyọma za, ọfha nze okkonọ-kkonọdikse nwoma mawuriji. Kayen kw’echi m’ẹwọma ekpon, ening ọttọhk ẹkwọmọ?"

4 K’ogbe kw’Ọvaar Ibinọkpaabyi oze ch’Mosẹs kk’ozenga ọnyọma za bẹ́, od-odo oze, Ibinọkpaabyi oninga ny’ottem kw’echi ndo, oyer-ẹ bẹ́, "Mosẹs! Mosẹs!"

Mosẹs ochera bẹ́, "Ttatta, kirẹ kaam ma."

5 Ibinọkpaabyi oben-ẹ bẹ́, "Ọdọk kidaam kanyọma, wọra ntọkọ sọ z’mmo, kirẹ ibyi s’abe nya, ide izek s’awuriji." 6 Obir oben-ẹ bẹ́, "Kaam wọ nde Ibinọkpaabyi kw’atte kwọ, mbir nde Ibinọkpaabyi kw’Abraham, ọmaana kw’Isaak, ọttara kw’Jekọb." Mosẹs otubha ititika sẹ, okurọ ojora bẹ́, oning Ibinọkpaabyi oze.

7 Nya o, Ọvaar Ibinọkpaabyi oben bẹ́, "K’odik ọkkọkka, kaam kk’irem s’anọng paam p’aning z’Ijip nza. Kk’bẹ mmaanga ch’mad-abhom ẹmọng okurọ irem s’akker-atọhmnọng mad-anang bẹ. Irem sabẹ kk’aam itwa. 8 Ofona nya, kaam kk’nkwa bẹ́, nkwu nrọbha bẹ z’mbọhk s’anọng p’Ijip, mbira nrọbha bẹ ny’izek njo, ntima bẹ nchina z’izek s’ijibh-ojibh, ibir iwen-owen, izek s’abasi ọmaana ọkọhn elor-olorọ, izek s’anọng p’Kenaan, ọmaana s’anọng p’Het, ọmaana s’anọng p’Amọr, ọmaana anọng p’Periz, ọmaana s’anọng p’Hiv ọttara s’anọng p’Jebus. 9 Ẹmọng ch’anọng p’Israẹl abhomọ kk’aam ẹtta k’itọhng, mbira nze irem s’anọng p’Ijip mad-anang bẹ. 10 Ofona nya, kaam m’ntọhm-ọ z’Phero bẹ́, ad-atọka anọng paam p’Israẹl atima abina ny’Ijip."

11 Nya o, Mosẹs oben Ibinọkpaabyi bẹ́, "Kaam nde anyi, kw’im’nta z’Phero bẹ́, nd-ntọka anọng p’Israẹl ntima mbina z’Ijip o?"

12 Ibinọkpaabyi oben bẹ́, "Kaam m’nninga mmaan-ọ. Ẹkọhka ch’im’atima azonga bẹ́, kaam wọ ntọhm-ọ ede bẹ́: k’ogbe kw’ikk’anọng mbo atima abina z’Ijip, bọnga mm’akpobh-m m’egbe nda."

13 Mosẹs ọpọhna Ibinọkpaabyi bẹ́, "Ó̱de nd-mben anọng p’Israẹl bẹ́, ‘Ibinọkpaabyi kw’abatte makpobh wọ ọtọhm-m k’abọnga,’ óde mabọbh-m bẹ́, ‘Kẹ okpen yen?’ kaam m’ntek bẹ yen o?"

14 Ibinọkpaabyi oben Mosẹs bẹ́, "KAAM WỌ NDE NWO KW’NDE." Obir oben bẹ́, "Tek anọng p’Israẹl bẹ́, KAAM WỌ NDE, wọ ọtọhm-m k’abọnga."

15 Ibinọkpaabyi obir oben Mosẹs bẹ́, "Tek anọng p’Israẹl bẹ́, ‘Ọvaar Ibinọkpaabyi, kw’ode Ibinọkpaabyi kw’abatte makpobh, Ibinọkpaabyi kw’Abraham ọmaana kw’Isaak, ọttara kw’Jekọb, kẹ wọ ọtọhm-m bẹ́ nkebha bọnga.’ Eche chaam ch’mm’nad-atima ajim-m k’ipemaanitor, dọ ma.

16 "Zọhng, ad-atobha asogbọhkọnọng p’Israẹl, aben bẹ bẹ́, ‘Ọvaar Ibinọkpaabyi, kw’ode Ibinọkpaabyi kw’abatte pabọnga, Ibinọkpaabyi kw’Abraham, ọmaana kw’Isaak, ọttara kw’Jekọb, kk’oyina okebh-m, oben-m bẹ́: Kaam kk’bọnga otum nka, mbira nze k’ose kw’mad-asi bọnga ny’Ijip. 17 Kaam kk’ncheka bẹ́, m’nrọhbha bọnga ny’irem njo s’mad-aze ny’Ijip, ntima bọnga nzeng z’izek ọkkọkka s’ide izek s’abasi, ọmaana ọkọhn malor-olorọ, izek s’anọng p’Kenaan, ọmaana s’anọng p’Het, ọmaana s’anọng p’Amọr, ọmaana s’anọng p’Periz, ọmaana s’anọng p’Hiv, ọttara s’anọng p’Jebus.’

18 "Asogbọhkọnọng p’Israẹl mm’ayong-ọ itọhng. Kọ ọmaana bẹ mm’ata z’ọvaarnọng kw’Ijip mad-aben-ẹ bẹ́, ‘Ọvaar Ibinọkpaabyi, kw’ode Ibinọkpaabyi kw’aHiburu, kk’ottema ọmaana mina. Tte mina ọbọhk mọta ozenga kw’iwu ittaan z’izek s’owora, mfha mọd-ọfọhnọ nja ọnang Ọvaar Ibinọkpaabyi kwamina.’ 19 Okenaka, kaam kk’nzonga bẹ́, ọvaarnọng kw’Ijip bọnga ọbọhk motte mafona, oye bẹ́, ẹfa chiden dọ im’ẹgwẹ-ẹ. 20 Minna kw’kaam m’ntima ẹfa chaam nsi anọng p’Ijip itama, mbir nsi ikkonọ-kkonọdik saabhada ny’abẹ k’ikpakaana. K’okpongannamgbe, kẹ m’otte bọnga ọbọhk, mafona.

21 "Kaam m’nsi anọng p’Ijip m’ayena nttem ọkkọkka amaana anọng mba, mfha k’ogbe kw’mm’abina, màning mbọhk-mbọhk azeng. 22 Tte kwanọng kpenamkpen ọbọbh oyok-oter, ọmaana kwanọng kw’matọn aruk, ekpo mach’asilva, ọmaana agol, ọttara ẹfọrakpo, py’mm’afọra aminava, ọmaana ajinọngva pabọnga. Minna wọ kw’mm’atima ana anọng p’Ijip ekpo."