Namgumgu Namun Ige Hal 8

1-3 Tō yatkel et mey a nēdēmap Ḡod en metvig nataqn̄ēn Steven, tō kēy mololwon hiy kē a nēkēkēn. Ba Sol mēvēwē ige a muwuh mat Steven.

Sol niakak tēktēk ige dēmtig

Nōqōn̄ tenenen a Steven mamat aē en, kēy qētēg ak tōqtōqyeg yeh ige tēlēm̄ yon̄ n̄a Jerusalem. Tō Sol mavan velvel ēm̄ so nitēy ige tam̄an tiwag mi ige lōqōvēn lēm̄ yētyēt. Tō ige tēlēm̄ yon̄ miyiy seleslen̄ mavan soloteg vel mahē a Judea wa Samaria. Ba ige hal ēwē a mahag lap Jerusalem.

Dikon Filip nitoytoy n̄a Samaria

4 Ba ige a mavan soloteg tō vel mahē en, kēy mavasemlō noyoy ēwē.

5 Ba Filip mahayveg me lelo vōnō Samaria, tō niqtēg toytoy noyoy ēwē veg Kraēs. 6 Mahē Filip nitoytoy en, ige sil mahaldin̄qoy galsi veg kēy metet naphah a kē magaleg en. 7 Filip mōvōyyakyak nuvu het m̄adeg a maqal ige et. Ba ige vu het magayka maymay tō nivan yak den kēy. Tō ige m̄adeg mey a nososol tiwag mi ige a nayn̄oy namat en, kēy mēwē lokse. 8 Tō ige telepnō nen memlaklak aē a nēkēkēn.

9 Ba lepnō nen net vitwag aē nahan Simon. Kē net sēsēil vitwag, tō ige del Tasamaria mamakē hiy kē aē. Kē mohole lem̄ag kē mahgen, 10 tō ige lililwo tiwag mi ige sil mahaldin̄qoy goy kē. Tō kēy mavap so net gōh naman non Ḡod aē mi kē, tō kēy mōl kē so, "Naman Liwo Telen̄len̄." *8:10 Ikē qele Iqet a net bagaleg vahah. 11 Tō kēy mahaldin̄qoy goy kē veg kē net tēytēybē a naman aē mi kē a malwowyak te tō me.

12 Ba mahē Filip motoytoy noyoy ēwē en, ige sil mēdēmtig. Tō ige tam̄an tiwag mi ige lōqōvēn mavasugyon̄ qēt. 13 Ba Simon mahgen mēdēmtig, tō kē mavasugyon̄ se. Vaga kē nivanvan tiwag mi Filip, tō kē nietet naphah wa nēvēglal a nitiy wē a Filip nigagaleg, tō kē nimamakē aē.

14 Mahē ige hal n̄a Jerusalem mēglal so ige Tasamaria moyon̄teg nohohole non Ḡod en, tō kēy mēvētleg Pita kōyō Jon hiy kēy. 15 Mahē Pita kōyō Jon mēdēn̄ me Samaria en, tō kōyō tatay so ige dēmtig del a Samaria en so ōyheg mi Nuvu Yon̄. 16 Veg Nuvu Yon̄ et hēw qete hiy kēy, ba kēy mavasugyon̄ lahan Welan Tigsas ēwē. 17 Bastō Pita kōyō Jon mōm̄ōk namneyō apwoy, tō kēy melep Nuvu Yon̄.

18 Simon met van so Nuvu Yon̄ mēhēw ige et mey a yoge hal matan̄ namneyō apwoy. Tō Simon nihog nēsēm van hiy kōyō, 19 tō mavap so, "No nemyōs naman nan. Lep te mino me tō so no wo matan̄ namnēk apwon ige et en, tō kēy tētēy se vēh Nuvu Yon̄."

20 Ba Pita meplu goy kē so, "?Nēk dēmdēm so nēk tēwēl vēh naman non Ḡod mi nēsēm? Tateh. Nēk qoyo mat tēytēy nēsēm anen. !Naman nan en natapēva non Ḡod! 21 Tateh nōnōm hap geh me agōh so biyin̄, veg nalo teqe et tenenen te lengon Ḡod. 22 Leh namtevu mey nehet, ba tatay van hiy Welan, so kē nidēmveteg nēmgu bēdēmdēm het a lelo teqe en. 23 Veg nok et van so nēk mōyheg mi naqneqneg, tō nubug mēyēt nēk."

24 Tō Simon meplu wo, "!Tatay maymay hiy Welan veg no, so nahap gōh tit qal te no!"

25 Pita kōyō Jon mavasemlō nohohole non Welan hiy ige Tasamaria, wa mohole gatay nahap a kōyō met kē magaleg tō. Kōyō mavasemlō bah, tō kōyō hatig tō m̄ōl. Mahē kōyō m̄ōlm̄ōl me Jerusalem en, kōyō mavan walēg napnō m̄adeg n̄a Samaria botoytoy noyoy ēwē.

Filip nihohole tiwag mi net telepnō Itiopia

26 Tō nin̄sel non Welan nihole van hiy Filip so, "Hatig, ba van tenenen hag lemtehal hiy Jerusalem, namtehal a nivan heylō van lepnō vadalm̄eg tō hēw tēqēl how Ḡaza."

27 Tō Filip nivan ēgēn. Kē nivanvan me lemtehal nen tō nietsas net vitwag nage telepnō Itiopia. Net nan, kēy mowot kē.*8:27 Nohohole a ‘kēy mowot kē’ en, namanig nan kēy mowot kē qele ige Tom̄otlap wotwot noqo si nōbōlōk. Tō kē noyowyowveg non nēqēt mayanag non ige Itiopia. Namyanag lōqōvēn nan nahan Kandase, tō net Titiopia nan nietetgoy nēsēm del nonon. Net Titiopia nan mavan tō Jerusalem batatay, 28 tō nim̄ōlm̄ōl lok me. Kē nahag lakat nonon a nohos niyapyap kē. Tō kē niptaptah nōbōk namun net lēgēlgēg Isaya. 29 Bastō, Nuvu Yon̄ mohole van hiy Filip so, "Van sisqet van nakat anen."

30 Filip mavan sisqet van en, tō kē niyon̄teg so net nan niptaptah nohohole non net lēgēlgēg Isaya, tō kē nivēhge van wo, "?Wō nēk nōm̄ōleg hiy nahap a nēk vatah tō en?"

31 Ba kē meplu lok van hiy Filip wo, "?No tōm̄ōleg qeleave veg tateh et nivatne no aē?" Tō kē niōlōl kal hag Filip so nihag tiwag mi kē lakat.

32 Natvēl yapyap a kē meptah en qelegēn:

Mahē kēy muwuh mat kē en, kē et vagalgoy te

qele ninti sipsip a kēy so wuh mat kē.

Tō qeleaso ninti sipsip nitig yoyon̄ mahē a kēy bal nēlēn en,

kē et wak te naplan.

33 Kēy mak mamayge nataqn̄ēn, tō kēy mēvēgal kē tō mēvēvēg kē.

Mahē nēh nonon meqlen̄ den namyam

tateh ēntēn qete, tō tateh ginwotwot nonon.✝8:33 Isaiah 53:7, 8

34 Tō net nan mēvēhge Filip wo, "Mi nēdēmap en, nok vēhge nēk. ?Net lēgēlgēg nihole gatay ihē, ikē mahgen siso net tegha?"

35 Tō Filip meqtēg mi natvēl yapyap nan, tō mavasemlō noyoy ēwē veg Tigsas van hiy kē. 36 Tō kōyō damdam tēqēl lapgetō yow namtehal wah, van sas nēbē a sisqet namtehal. Tō net nan nivap van hiy Filip wo, "!Et van en! !Nēbē agōh! ?Nahap nigatgoy no so no tit vasugyon̄ vēhte?"

37 Tō Filip meplu goy kē van so, "Nēk wo nēdēmtig hēywē Tigsas en, nēk tavasugyon̄ vēh."

Tō net nan meplu so, "No nēdēmtig so Tigsas Kraēs, ikē Ēntēn Ḡod."*8:37 Yatkel bōk Baebol tam̄ag, a kēy mayapwoy lagatgat Tikrik en, nayte 37 tateh.

38 Tō net nan mōlvayēg so higoy how nakat. Tō kōyō mēhēw tēqēl how lēbē. Tō Filip nivasugyon̄ kē. 39 Nuvu non Welan nilep yak Filip tō nivantēy qelen̄ kē. Tō net Titiopia et etsas lok te kē. Ba kē mōm̄ōl tasga mi nam̄sēksēk.

40 Ba Filip et van qele kē, kē tigtō lepnō tegha, nahe vōnō nan Asotus. Tō kē nivanvan walēg lelqelqevōnō del tō nitoytoy noyoy ēwē, tō mavan dēn̄ n̄a lepnō liwo Sisaria.