1 ହେପାଦ୍‌ନା ମସା ଆରି ଇସ୍ରାଏଲ୍‌ ମାଜ଼ିର୍‌ ନିତ୍ରେମାପ୍ରୁ ଉଦେସ୍‌ତ ଇ କେର୍‌କଣ୍‌ କେର୍‌ତାର୍‌, ଇଚିସ୍‌ ଆସ୍‌ ନିତ୍ରେମାପ୍ରୁ ଉଦେସ୍‌ତ କେର୍‌ନାସ୍‌, ଇନାକିଦେଂକି ହେୱାନ୍‌ ବେସି ଉନତି ଆତାନ୍‌ନା; ହେୱାନ୍‌ ଗଡ଼ା ଆରି ଚାଲାୟ୍‌କିନାକାରିଂ ହାମ୍‌ଦୁର୍‌ତ ତୁହିତାନ୍‌ । 2 ନିତ୍ରେମାପ୍ରୁ ମା ସାକ୍ତି ଆରି କେର୍‌କଣ୍‌, ଆରେ, ଅମାଲେକ ମାଦାଂ ମୁକ୍‌ଡ଼ାୟ୍‌ କିତ୍‌ତାନ୍ନା; ହେୱାନ୍‌ ମା ପରମେସ୍ୱର୍‌, ଆସେଙ୍ଗ୍ ତାଙ୍ଗେଙ୍ଗ୍ ୱାରି କିନାସ୍‌; ହେୱାନ୍‌ ମା ଆକର୍‌ଦାଦିର୍‌ ପରମେସ୍ୱର୍‌, ଆସେଙ୍ଗ୍ ତାଙ୍ଗ୍‌ ଗୁଣ୍‌ କେର୍‌ନାସ୍‌ । 3 ନିତ୍ରେମାପ୍ରୁ ଜୁଜ୍‌ତିଂ ବିର; ନିତ୍ରେମାପ୍ରୁ ତା ତର୍‌ । 4 ହେୱାନ୍‌ ପାରତି ରତ ଆରି ମେଲ୍ୟାରିଂ ହାମ୍‌ଦୁର୍‌ତ ତୁହିତାର୍ଣ୍ଣା; ଆରେ, ହେୱାର୍‌ ବାଚିକିତି ବିରର୍‌ ନେତେର୍‌ ହାମ୍‌ଦୁର୍‌ତ ମୁଞ୍ଜ୍‌ଚାର୍ଣ୍ଣା । 5 ବେସି ଡେଙ୍ଗା ଏଜ଼ୁଙ୍ଗ୍ ହେୱାରିଂ ଡାବାୟ୍‌ କିତାନ୍ନା, ହେୱାର୍‌ ଅହାର୍‌ ଲାକେ ଡେଙ୍ଗା ଏଜ଼ୁକାଂ ମୁଞ୍ଜ୍‌ଚାର୍‌ । 6 ଏ ନିତ୍ରେମାପ୍ରୁ, ମିଦାଂ ତିନା କେଇ ସାକ୍ତିତାଂ ଜାଜ୍‌ମାଲ୍‌; ଏ ନିତ୍ରେମାପ୍ରୁ, ମି ତିନା କେଇ ସାତ୍ରୁରିଂ ବିରାୟ୍‌ କିନାତ୍‌, 7 ଏପେଙ୍ଗ୍ ଜାର୍‌ ଗାଜା ପାଣ୍‌ତ ଜାର୍‌ ବାନ୍ୟାରିଂ ଅସ୍ତି ମାନା; ଏନେଙ୍ଗ୍ ଜାର୍‌ ରିସା ପକ୍ତା, ହେଦାଂ ହେୱାରିଂ ନାଡ଼ା ଲାକେ ୱିହ୍‌ନାତ୍‌ । 8 ଏପେଙ୍ଗ୍ ମୁଙ୍ଗେତାଂ ନେଞ୍ଜ୍‌ନି କାଜିଙ୍ଗ୍ ଏଜ଼ୁଙ୍ଗ୍ ଜମ୍‌ତିକ୍‌; ଚାଲାନିକିଂ ଜମ୍‌ତିକ୍‌, ହାମ୍‌ଦୁର୍‌ ମାଦି ବାହାତ ଡେଙ୍ଗା ଏଜ଼ୁଙ୍ଗ୍‌ ଜାମ୍‌ ଆତିକ୍‌ । 9 ସାତ୍ରୁ ଇଚାତ୍‌; ଆନେଙ୍ଗ୍ ପାଚେ ପାଚେ ହନ୍‌ନାସ୍‌, ଆସେଙ୍ଗ୍ ହେୱାରିଂ ଆହ୍‌ନାସ୍‌, ଆସେଙ୍ଗ୍ ଚରିକିତି ଜିନିସ୍‌ ବାଟା କିଜ଼ି ଅନାସ୍‌; ହେୱାର୍‌ ଜପି ମା ଆହା ପୁରା ଆନାତ୍‌; ଆସେଙ୍ଗ୍ ଜାର୍‌ କାଣ୍ଡା ଜେଲ୍‌ନାସ୍‌, ମା କେଇଦାଂ ହେୱାରିଂ ନାସ୍‌ କିନାସ୍‌ । 10 ମତର୍‌ ଏପେଙ୍ଗ୍ ଜାର୍‌ ନେଞ୍ଜ୍‌ନି କାଜିଙ୍ଗ୍ ତୁପ୍‌ତିସ୍‌, ହାମ୍‌ଦୁର୍‌ ହେୱାରିଂ ଡାବାୟ୍‌ କିତାତ୍‌, ହେୱାର୍‌ ସିସ୍‌ୱା ଲାକେ ଡେଙ୍ଗା ଏଜ଼ୁକାଂ ମୁଞ୍ଜ୍‌ଚାର୍‌ । 11 ଏ ନିତ୍ରେମାପ୍ରୁ, ପେନ୍‌କୁ ବିତ୍ରେ ମି ଲାକେ ଇନେର୍‌ ? ନି ସମାନ୍‌ ପୁଇପୁୟାତ ୱାରିନିକା, ୱାରିତାଂ ପାଣ୍ଡ୍ରୁନିକା ଆରି କାବାକିନିକାମାୟ୍‌ କିନାକାନ୍‌ ଇନେର୍‌ ? 12 ଏନେଙ୍ଗ୍ ଜାର୍‌ ତିନାକେଇ ଲାମାୟ୍‌ କିତାୟ୍‌ ପୁର୍ତି ହେୱାରିଂ ୱିସ୍ତାତ୍‌ । 13 ଏନେଙ୍ଗ୍ ଜାର୍‌ ଦୟାତାଂ ଜାର୍‌ ମୁକ୍‌ଡ଼ା ଆତାକାରିଂ ଚାଲାୟ୍ କିନାୟା, ଏନେଙ୍ଗ୍ ଜାର୍‌ ସାକ୍ତିତାଂ ହେୱାରିଂ ରାସ୍ତା ଚଚ୍‌ଚି ମି ପୁଇପୁୟା ବାହାତ ଅସି ହାଞ୍ଜ୍‌ନାୟା । 14 ମାନାୟାର୍‌ ଇଦାଂ ୱେଚାର୍ଣ୍ଣା, ହେୱାର୍‌ ପାଣ୍ଡ୍ରାନାରା; ନନାକା ପାଲେସ୍ଟିୟ ମାନାକାରିଂ ବେମାର୍‌ କିତାନ୍ନା । 15 ହେପାଦ୍‌ନା ଇଦମ୍‌ନି ନେତାର୍‌ ବିଲ୍‌କି ଆତାର୍‌; କଂପ ମୟାବର ନେତାର୍‌ ମାନାୟାରିଂ ଅହ୍‌ନାନା; କିଣାନ୍‌ତ ମାନାକାର୍‌ ୱିଜ଼ାର୍‌ ତରହର ଆତାର୍‌ । 16 ପାଣ୍ଡ୍ରୁ ଆରି ବିପ୍‌ତି ହେୱାର୍‌ ଜପି ଆର୍ଣ୍ଣାତା; ଏ ନିତ୍ରେମାପ୍ରୁ, ଏଚେକ୍‌ ପାତେକ୍‌ ମି ମାନାୟାର୍‌ ହାଲ୍‌ୱାତାର୍ଣ୍ଣା, ଏଚେକ୍‌ ପାତେକ୍‌ ମି କଡ଼୍‌ତି ଲକୁ ହାଲ୍‌ୱାତାର୍ଣ୍ଣା, ହେ ପାତେକ୍‌ ନି ବପୁ ହୁଦାଂ ହେୱାର୍‌ କାଲ୍‌ଲାକେ ଇଟ୍ୟା ଆଜ଼ି ମାନାର୍‌ । 17 ଏ ନିତ୍ରେମାପ୍ରୁ, ଏନେଙ୍ଗ୍ ଜାର୍‌ ମାନାକାର୍‌ କାଜିଂ ଇମ୍‌ଣି ବାହା ରଚ୍‌ଚାୟ୍‌ନା, ମାପ୍ରୁ, ନି କେଇ ଇମ୍‌ଣି ପୁଇପୁୟା ବାହା ରଚ୍‌ଚାୟ୍‌ନା, ଏନେଙ୍ଗ୍ ହେୱାରିଂ ତାସି ଜାର୍‌ତି ହେ ଆଦିକାର୍‌ ମାଡ଼ିତ ଇଟ୍‌ନାୟ୍‌ । 18 ନିତ୍ରେମାପ୍ରୁ ଜୁଗ୍‌ ଜୁଗ୍‌ ପାତେକ୍‌ ୱିଜ଼୍‌ୱି କାଡ଼୍‌ ରାଜ୍‌ କିନାନ୍‌ ।

19 ଇନାକିଦେଂକି ପାରତି ଗଡ଼ା, ହାଗାଡ଼୍‌ ଆରି ଗଡ଼ା ଚାଲାୟ୍‌କିନାକାର୍‌ ହାମ୍‌ଦୁର୍‌ ବିତ୍ରେ ହଟିଲେ, ନିତ୍ରେମାପ୍ରୁ ହେୱାର୍‌ ଜପି ଆରେରଗ ହାମ୍‌ଦୁର୍‌ ଏଜ଼ୁଙ୍ଗ୍‌ ତାହିୱାତାର୍‌; ମତର୍‌ ଇସ୍ରାଏଲ୍‌ ହିମ୍‌ଣାଂ ୱାଚ୍‌ଚି ହାଜ଼ି ହିଜ଼ି ହାମ୍‌ଦୁର୍‌ ବିତ୍ରେ ହାଚାର୍‌ । 20 ଇଦାଂ କାଜିଂ ହାରଣ୍‌ତି ତଣ୍‌ଦେହି ବେଣ୍‌ବାକ୍‌ଣାୟ୍‌କିନାକାଦେଲ୍‌ ମରିୟମ୍‌ କେଇଦ ଡାପ୍ ଅତାତ୍‌ ଆରି ତା ପାଚେ ପାଚେ ବିନ୍‌ କଗ୍‌ଲେକ୍‌ ଡାପ୍‌ ଅଜ଼ି ଏନ୍‌ନ୍ଦି ଏନ୍‌ନ୍ଦି ହତ୍‌ତିକ୍‌ । 21 ହେପାଦ୍‌ନା ମରିୟମ୍‌ ମାନାୟାରିଂ ଉତର୍‌ କିତାତ୍‌, "ଏପେଙ୍ଗ୍ ନିତ୍ରେମାପ୍ରୁ ଉଦେସ୍‌ତ କେରାଟ୍‌; ଇନାକିଦେଂକି ହେୱାନ୍‌ ବେସି ଗାଜା କାମାୟ୍‌ କିତାନ୍‌ନା; ହେୱାନ୍‌ ଗଡ଼ା ଆରି ଗଡ଼ା ଚାଲାୟ୍‌କିନାକାରିଂ ହାମ୍‌ଦୁର୍‌ତ ତୁହିତାର୍ଣ୍ଣା ।"

22 ଇଦାଂ ପାଚେ ମସା ଇସ୍ରାଏଲ୍‌ତିଂ ସୁପ୍‌ ହାମ୍‌ଦୁର୍‌ତାଂ ଅସିହାଚାନ୍‌, ଆରେ, ହେୱାର୍‌ ସର୍‌ ବାଟା ନିପ ହାଚାର୍‌, ହେୱାର୍‌ ବାଟାତ ତିନ୍‌ ଦିନ୍‌ ହାଲ୍‌ଜି ଏଜ଼ୁଙ୍ଗ୍‌ ଗାଟା ଆୱାତାର୍‌ । 23 ପାଚେ ହେୱାର୍‌ କେନିତାକେ ଏକିତିଲେ, କେନିକିଂ କାଜିଂ ମାରାନି ଏଜ଼ୁଙ୍ଗ୍ ଉଣ୍ଡେଙ୍ଗ୍‌ ଆଡ଼୍‌ୱାତାର୍‌; ଲାଗିଂ ତା ତର୍‌ ମାରା ଆତାତ୍‌ । 24 ହେପାଦ୍‌ନା ମାନାୟାର୍‌ ମସାତି ବିରୁଦ୍‌ତ ଗାଣ୍‌ଜୁ କିଜ଼ି ଇଚାର୍‌, "ଆସେଙ୍ଗ୍ ଇନାକା ଉଣାସ୍‌ ?" 25 ହେବେ ହେୱାନ୍‌ ନିତ୍ରେମାପ୍ରୁ ଲାଗାଂ ପାର୍ତାନା କିତିଲେ, ନିତ୍ରେମାପ୍ରୁ ତାଙ୍ଗେଙ୍ଗ୍‌ ର ବାନି ବାଡ଼୍‌ଗା ଚଚ୍‌ଚାନ୍‌, ହେୱାନ୍‌ ହେଦାଂ ଅଜ଼ି ଏଜ଼ୁକାଂ ତୁଇତିଲେ, ଏଜ଼ୁଙ୍ଗ୍ ଉଣ୍ଡେଙ୍ଗ୍‌ ଆତିକ୍‌ । ହେ ବାହାତ ନିତ୍ରେମାପ୍ରୁ ହେୱାର୍‌ କାଜିଂ ବିଦି ଆରି ଆଦେସ୍‌ ରଚ୍‌ଚାନ୍‌, ଆରେ, ହେୱାର୍‌ ପରିକ୍ୟା ଅଜ଼ି ଇଚାନ୍‌, 26 "ଏପେଙ୍ଗ୍ ଜଦି ଜାର୍‌ ନିତ୍ରେମାପ୍ରୁ ପରମେସ୍ୱର୍‌ତି ବଚନ୍‌ତ ମାନ୍‌ଦିୟାନ୍‌ ହିୟାଟ୍‌, ତା କାଣ୍‌କୁକାଂ ଇନାକା ହାର୍‌ ହେଦାଂ କିୟାଟ୍‌, ତା ବଲ୍‌ତ କିତୁଲ୍‌ ହିୟାଟ୍‌ ଆରି ତା ବିଦି ସବୁ ପାଲି କିୟାଟ୍‌, ଲାଗିଂ ଆପେଙ୍ଗ୍ ମିସ୍ରିୟ ମାନାୟାରିଂ ଜେ ସବୁ ରଗ୍‌ କିୟ୍‌କିତାପ୍‌, ହେଦାଂ ସବୁ ମିଙ୍ଗେଙ୍ଗ୍ କସ୍ଟ ହିଦୁପ୍‌, ଇନାକିଦେଂକି ଆନେଙ୍ଗ୍ ନିତ୍ରେମାପ୍ରୁ ମିଙ୍ଗେଙ୍ଗ୍ ଉଜ୍‌କିନାକାଂ ।" 27 ଇଦାଂ ପାଚେ ହେୱାର୍‌ ଏଲିମତାକେ ଏକାତାର୍‌; ହେବେ ଏଜ଼ୁଙ୍ଗ୍‌ନି ବାରଗଟା ଜାରାଣ୍‌ ଆରି ସତୁରି ଗଟା କାଜ୍ରି ମାର୍‌କୁ ମାଚିକ୍‌; ହେବେ ହେୱାର୍‌ ହେ ଏଜ଼ୁଙ୍ଗ୍ ଲାଗାଂ ଚାଉଣି ରଚ୍‌ଚାର୍‌ ।