କାଲ୍କୁତାଂ ଏସ୍
1 ଇଦାଂପାଚେ ଇସ୍ରାଏଲ୍-ହିମ୍ଣାଙ୍ଗ୍ନି ୱିଜ଼ୁ ମଣ୍ଡ୍ଲି ସିନ୍ ବାଟାତାଂ ହାଲ୍ଜି ନିତ୍ରେମାପ୍ରୁତି ବଲ୍ ଇସାବ୍ରେ ସମାନ୍ ସବୁ ଜୁନି ବାହା ହିଜ଼ି ରପିଦିମତ କେପ୍ ରଚ୍ଚାର୍; ମତର୍ ହେ ବାହାତ ମାନାୟାର୍ତି ଉଣ୍ଡେଙ୍ଗ୍ ଏଜ଼ୁଙ୍ଗ୍ ହିଲିତିକ୍ । 2 ଇଦାଂକାଜିଂ ମାନାୟାର୍ ମସାତି ଲାହାଂ କେତ୍ପାଜ଼ି ଇଚାର୍, "ମାଂ ଏସ୍ ହିଦା, ଆପେଙ୍ଗ୍ ଉଣାପ୍ ।" ପାଚେ ମସା ଇଚାନ୍, "ଏପେଙ୍ଗ୍ ନା ଲାହାଂ ଇନେକିଦେଂ ଗଣ୍ଡ୍ଗଲ୍ କିନାଦେର୍ ? ଇନେକିଦେଂ ନିତ୍ରେମାପ୍ରୁଙ୍ଗ୍ ପରିକ୍ୟା କିନାଦେର୍ ?"
3 ହେଏଚେକାଡ଼୍ଦ ମାନାୟାର୍ ହେ ବାହାତ ଏସ୍ଅବାବ୍ କାଜିଂ ଏସ୍କି ଆଜ଼ି ମସାତି ବିରୁଦ୍ତ ନିନ୍ଦା କିଜ଼ି ଇଚାର୍, "ଇନେକିଦେଂ ଏନ୍ ମାଂ, ମା ମାଜ଼ିରିଂ ଆରି ପସୁକାଂ ଏସ୍କିତ ପାଗ୍ନି କାଜିଂ ମିସର୍ତାଂ ତାହିୱାତ୍ତାୟ୍ ?"
4 ହେବେଣ୍ଡାଂ ମସା ନିତ୍ରେମାପ୍ରୁତି ଲାଗାୟ୍ ପାର୍ତନା କିଜ଼ି ଇଚାନ୍, "ଆନ୍ ଇ ମାନାୟାର୍ କାଜିଂ ଇନାକା କିନାଙ୍ଗ୍ ? ହେୱାର୍ ନାଂ କାଲ୍କୁ ଅସ୍ତେଦେଂ ଜାଲ୍ଦି ଆନାରା ।" 5 ହେବେ ନିତ୍ରେମାପ୍ରୁ ମସାଙ୍ଗ୍ ଇଚାନ୍, "ଏନ୍ ଇନାକାହୁକେ ନାଗୁଡ଼୍ତିଂ ଇଡ଼୍ଜି ମାଚାୟ୍, ହେ ବାଡ୍ଗେ କେଇଦାଂ ଅଜ଼ି ଇସ୍ରାଏଲ୍ନି କେତେଜାଣ୍ ବୁଡ଼ାଲୁର୍ ଲାହାଂ ଇସ୍ରାଏଲ୍ ମାନାୟାର୍ ଆଗେ ଆଗେ ହାଲା । 6 ହୁଡ଼ାଟ୍, ଆପ୍ ହରେବ୍ତ ହେ କାଲ୍ ଜପି ମି ମୁମ୍ଦ ନିଲ୍ନାପ୍; ଏନ୍ ହେ କାଲ୍ଦିଂ ଇଡ଼୍ତିସ୍, ହେବେଣ୍ଡାଂ ଏଜ଼ୁଂ ହତ୍ନିକ୍, ଆରେ ମାନାୟାର୍ ହେୱାଙ୍ଗ୍ ଉଣାର୍ ।" ତେବେ ମସା ଇସ୍ରାଏଲ୍ନି ବୁଡ଼ାଲୁର୍ କାଣ୍କୁତ ହେଲାକେ କିତାନ୍ ।
7 ଆରେ, ହେ ବାହାତ ଇସ୍ରାଏଲ୍-ହିମ୍ଣାଙ୍ଗ୍ତି ଗଣ୍ଡ୍ଗଲ୍ କାଜିଂ ଆରି ନିତ୍ରେମାପ୍ରୁ ମା ବିତ୍ରେ ମାନାନ୍ କି ଆକାୟ୍, "ଇଦାଂ ଇଞ୍ଜି ନିତ୍ରେମାପ୍ରୁତିଂ ପରିକ୍ୟା କିନି କାଜିଂ ହେୱାନ୍ ହେ ବାହାନି ତର୍ ମସା17:7 ଇଚିସ୍ ପରିକ୍ୟା ଆରି ମିରିବା17:7 ଇଚିସ୍ ଗଣ୍ଡ୍ଗଲ୍ ଇଡ଼୍ତାନ୍ ।"
ଅମାଲେକିୟର୍ତି ଲାହାଙ୍ଗ୍ ଜୁଜ୍
8 ହେ ୱେଡ଼ାଲିଂ ଅମାଲେକ୍ ୱାଜ଼ି ରପିଦିମତ ଇସ୍ରାଏଲ୍ ଲାହାଂ ଜୁଜ୍ କିତାନ୍ । 9 ପାଚେ ମସା ଜିହସୁୟତିଂ ଇଚାନ୍, "ଏନ୍ ମା କାଜିଂ ମାନାୟ୍ ବାଚି କିଜ଼ି ଅମାଲେକ୍ ଲାହାଂ ଜୁଜ୍ କିଦେଂ ହାଲା; ୱିଗାଲିଂ ଆନ୍ ନା କେଇଦ ପର୍ମେସ୍ୱର୍ ବାଡ୍ଗେ ଅଜ଼ି ମାଡ଼ି ଜପି ନିଲ୍ନାଂ ।" 10 ପାଚେ ମସାତି ବଲ୍ ଇସାବ୍ରେ ଜିହସୁୟ ଅମାଲେକ୍ ଲାହାଂ ଜୁଜ୍ କିତାନ୍, ଆରେ, ମସା ଆରି ହାରଣ, ହୁର ମାଡ଼ି ଜପି ଦୁମ୍ତାର୍ । 11 ଆରେ, ମସା ଜାର୍ କେଇ ଜପି ପେସ୍ତି ୱେଡ଼ାଲିଂ ଇସ୍ରାଏଲ୍ ଜିଣା ଆତାନ୍ ଆରି ହେୱାନ୍ ଜାର୍ କେଇ ଟଡ଼୍ତି ୱେଡ଼ାଲିଂ ଅମାଲେକ୍ ଜିଣା ଆତାନ୍ । 12 ମତର୍ ମସାତି କେଇ ୱାସ୍ତାତ୍; ଇନେକିଦେଂକି ହେୱାର୍ ର କାଲ୍ ତାସି ତା ତାରେନ୍ ଇଡ୍ତିଲେ, ମସା ତା ଜପି କୁଚ୍ଚାନ୍, ଆରେ, ହାରଣ ଆରି ହୁର ମାଡ଼ିତ ରୱାନ ଇ ବାଗାଙ୍ଗ୍ ଆରେ ରୱାନ୍ ହେ ବାଗାଙ୍ଗ୍ ତା କେଇ ପେସ୍ଦି ଆସ୍ତାର୍; ହେବେ ୱେଡ଼ାହାନି ପାତେକ୍ ତା କେଇ ତିର୍ ମାଚାତ୍ । 13 ଲାଗିଂ ଜିହସୁୟ ଅମାଲେକ୍ତିଂ ଆରି ତା ମାନାୟାର୍ତିଂ କାଣ୍ଡାଦାରାତ ଆରାୟ୍ କିତାନ୍ ।
14 ଇଦାଂପାଚେ ନିତ୍ରେମାପ୍ରୁ ମସାଂ ଇଚାନ୍, "ଇ କାତା ଏତୁକିନି କାଜିଂ ପତିତ ଲେକିକିଜ଼ି ଇଟାଟ୍, ଆରେ, ଜିହସୁୟତି ମୁମ୍ଦ ହେଦାଂ ପଡ଼ି କିୟାଟ୍; ଇଚିସ୍, ଆପ୍ ଆକାସ୍ ତାରେନ୍ତାଂ ଅମାଲେକ୍ନି ଏତ୍ ଡ଼ୁକ୍ନାପ୍ ।" 15 ହେବେ ନିତ୍ରେମାପ୍ରୁ ମସା ର ଗାର୍ଣି ରଚ୍ଚି ତା ତର୍ ଜିହବା ପତ୍କା17:15 ଜେଣ୍ଡା ଇଡ୍ତାନ୍ । 16 ଆରେ, ହେୱାନ୍ ନିତ୍ରେମାପ୍ରୁତି ବାନାତ କେଇ ହିଜ଼ି ଇଚାନ୍, "ଆକର୍ଇସାବ୍ରେ ଅମାଲେକ୍ ଲାହାଂ ନିତ୍ରେମାପ୍ରୁତି ଜୁଜ୍ ଆନାତ୍ ।"
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)