1 ମିସର୍‌ ଦେସ୍‌ତାଂ ଇସ୍ରାଏଲ୍‌-ହିମ୍‌ଣାଙ୍ଗ୍‌ ହନିହିଂ ତିନ୍ ମାସ୍‌ନି ପର୍‌ତୁମ୍‌ ଦିନ୍ତ, ହେୱାର୍‌ ସିନୟ ବାଟାତ ଏକାତାର୍‌ । 2 ହେୱାର୍‌ ରପିଦିମତାଂ ହାଜ଼ିଆସ୍ତି ସିନୟ ବାଟାତ ଏକିତିଲେ, ହେ ବାଟାତ ଚାଉଣି ରଚ୍‌ଚାର୍‌; ଇସ୍ରାଏଲ୍‌ ହେ ବାହାତ ମାଡ଼ି ହାଣ୍‌କୁତ ଚାଉଣି ରଚ୍‌ଚାର୍‌ । 3 ଇଦାଂପାଚେ ମସା ପର୍‌ମେସ୍ୱର୍‌ ଲାଗାୟ୍‌ ହାଚିଲେ, ନିତ୍ରେମାପ୍ରୁ ମାଡ଼ିତାଂ ତାଙ୍ଗେଙ୍ଗ୍‌ କୁକ୍‌ଚି ଇଚାନ୍‌, "ଏନ୍‌ ଜାକୁବ ବଁସ୍‌ତିଂ ଇ କାତା ଇନା ଆରି ଇସ୍ରାଏଲ୍‌-ହିମ୍‌ଣାଙ୍ଗ୍‌କାଂ ଇଦାଂ ୱେଚା ।" 4 ଆପ୍‌ ମିସ୍ରିୟର୍‌ କାଜିଂ ଇନାକା କିତାପ୍‌ ଆରି ମିଂ ଇନେସ୍‌ ରାମାଣ୍‌ ପଟି କେଲ୍‌ଦ ପିଣ୍‌ଜି ଜାର୍‌ ଲାଗାୟ୍‌ ତାହିୱାତ୍‌ତାପ୍‌, ହେଦାଂ ଏପେଙ୍ଗ୍‌ ହୁଡ଼୍‌ତାଦେର୍ଣ୍ଣା । 5 ନଂ ଏପେଙ୍ଗ୍‌ ଜଦି ମା କୁକ୍‌ନିତ ମାନ୍‌ଦିଆନ୍‌ କିନାଦେର୍‌ ଆରି ମା ନିୟମ୍‌ ମାନି କିନାଦେର୍‌, ତେବେ ଏପେଙ୍ଗ୍‌ ୱିଜ଼ାର୍‌ ଲକୁତାଂ ପିସ୍ତି ମା ନିଜ୍‌ ଇଡ଼୍‌ତି ଦନ୍‌ ଆନାତ୍‌; ଇନେକିଦେଂକି ୱିଜ଼ୁ ପୁର୍ତି ମାଦାଂ । 6 ଆରେ, ଏପେଙ୍ଗ୍‌ ମା କାଜିଂ ମାପ୍ରୁହେବାକିନାକାର୍ତି ର ରାଜାବଁସ୍‌ ଆରି ର ପୁଇପୁୟା କୁଟୁମ୍‌ ଆନାଦେର୍‌; ଇ ସବୁ କାତା ଏନ୍‌ ଇସ୍ରାଏଲ୍‌-ମାଜ଼ିରିଂ ଇନା । 7 ପାଚେ ମସା ୱାଜ଼ି ଲକୁର୍ତି ବୁଡ଼ାଲୁରିଂ କୁକିକିଜ଼ି ନିତ୍ରେମାପ୍ରୁତି ହୁଦାଂ ବଲ୍‌ପାୟାଜ଼ି ଇ ସବୁ କାତା ହେୱାର୍‌ତି ମୁମ୍‍ଦ ୱେଚ୍‌ଚାନ୍‌ । 8 ହେବେ ୱିଜାର୍‌ ମାନାୟ୍‌ ର ଲାହାଙ୍ଗ୍‌ ରବେ ଆଜ଼ି ଇଚାର୍‌, "ନିତ୍ରେମାପ୍ରୁ ଇମ୍‌ଣି କାତା ଇଚାନ୍ନା, ହେଦାଂ ସବୁ ଆସେଙ୍ଗ୍‌ କିନାସ୍‌ ।" ହେଏଚେକାଡ଼୍‌ଦ ମସା ନିତ୍ରେମାପ୍ରୁ ଲାଗାୟ୍‌ ମାନାୟ୍‌ତିଂ କାତା ୱେଚ୍‌ଚାନ୍ । 9 ପାଚେ ନିତ୍ରେମାପ୍ରୁ ମସାଂ ଇଚାନ୍, "ହୁଡ଼ା, ଆପ୍ ମି ଲାହାଂ କାତା ଇନି ୱେଡ଼ାଲିଂ ମାନାୟାର୍‌ ଇନେସ୍‌ ହେଦାଂ ୱେଞ୍ଜେଙ୍ଗ୍‌ ଆଡ୍‌ନାର୍‌, ଆରେପା ନିତାକେ ନିତ୍ରେ ପାର୍ତି କିନାର୍‌, ଇଦାଂକାଜିଂ ଆପ୍‌ ଗୁକ୍‌ଟାନି ବାଦାଡ଼୍‌ତ ମି ଲାଗାୟ୍‌ ୱାନାପା ।" ଇଦାଂପାଚେ ମସା ମାନାୟାର୍‌ତି କାତା ନିତ୍ରେମାପ୍ରୁଙ୍ଗ୍‌ ୱେଚ୍‌ଚାନ୍ । 10 ପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏନ୍‌ ମାନାୟ୍‌ ଲାଗାୟ୍‌ ହାଲ୍‍ଜି ନେଞ୍ଜେଙ୍ଗ୍‌ ଆରି ୱିଗା ହେୱାରିଙ୍ଗ୍‌ ପୁଇପୁୟା କିଆ, ଆରେ, ହେୱାର୍‌ ଜାର୍‌ ଜାର୍‌ ହେନ୍ଦ୍ରାଂ ହକେର୍‌ 11 ଆରି ତିନ୍‌ ଦିନ୍‌ କାଜିଂ ୱିଜାର୍‌ ଜାଲ୍‌ଦି ଆୟେର୍‌: ଇନେକିଦେଂକି ତିନ୍‌ ଦିନ୍‌ତ ନିତ୍ରେମାପ୍ରୁ ୱିଜାର୍‌ ମାନାୟାର୍‌ ମୁମ୍‌ଦ ସିନୟ ମାଡ଼ି ଜପି ଜୁଜ଼ି ୱାନାନ୍‌ । 12 ଇଦାଂକାଜିଂ ଏନ୍‌ ମାନାୟ୍‌ରିଂ ଚାର୍‌ବେଣ୍‌ତି ହାନ୍ଦି ରଚ୍‌ଚି ଇ କାତା ଇନା, ଏପେଙ୍ଗ୍‌ ମାଡ଼ିଦୁମ୍‌ନାକା ଆରି ହେବେନି ହାନ୍ଦି ଡୁଦେଂ ଜାଗ୍ରତ୍‌ ଆଡୁ; ଇନେର୍‌କି ମାଡ଼ି ଡୁନାର୍‌, ହେୱାନ୍‌ ଇନେସ୍‌ପା ହାନାନ୍‌ । 13 ଇନେର୍ତି କେଇ ହେଦେଲିଂ ଡୁମାଟ୍‌, ମତର୍‌ ହେୱାନ୍‌ ଆତିସ୍ପା କାଲ୍‌କୁଅହ୍ୟାଜ଼ି ହାନାନ୍‌, କି ଆମ୍‌ ହୁକେ ଏଚ୍ୟାନାନ୍‌; ପସୁ କି ମାନାୟ୍‌ ଆୟେନ୍‌, ମୁଡ଼େ ଜିଉନ୍‌; ମରିନି ଗାଜା କାଟ୍‌ ଆତିସ୍‌ ହେୱାର୍‌ ମାଡ଼ି ପାତେକ୍‌ ନିଂଜି ୱାନାର୍‌ ।" 14 ଇଦାଂପାଚେ ମସା ମାଡ଼ିତାଂ ଜୁଜ଼ି ମାନାୟ୍‌ ଲାଗାୟ୍‌ ୱାଜ଼ି ହେୱାରିଙ୍ଗ୍‌ ପୁଇପୁୟା କିତାନ୍‌, ଆରେ, ହେୱାର୍‌ ଜାର୍‌ ଜାର୍‌ ହେନ୍ଦ୍ରା ସବୁ ହକ୍‌ତାର୍‌ । 15 ପାଚେ ହେୱାନ୍‌ ମାନାୟ୍‌ରିଂ ଇଚାନ୍‌, "ଏପେଙ୍ଗ୍‌ ତିନ୍‌ ଦିନ୍‌ କାଜିଂ ଜାଲ୍‍ଦି ଆଡୁ; ଆରେ ଜାର୍‌ ଜାର୍‌ ଡକ୍ରି ଲାହାଂ ହୁଞ୍ଜ୍‌ମାଟ୍‌ ।" 16 ଇଦାଂପାଚେ ତିନ୍ ଦିନ୍‌ନି ନାଡ଼ିସ୍‌ ଆତିଲେ, ବାଦାଡ଼୍‌ ଗାର୍ଜାତାତ୍‌ ଆରି ବିଜ୍‌ଲି ଆରି ମାଡ଼ି ଜପି ଗୁକ୍‌ଟା ବାଦାଡ଼୍‌ ଆରି ବେସି ଗାଜା କାଟ୍‌ତ ମରିଗାଜ୍ରାଦେଂ ଲାଗାତାତ୍‌; ହେବେ ଚାଉଣିତ ମାନି ମାନାୟ୍‌ ତ୍ରିଗ୍‌ଜି ହାଚାର୍‌ । 17 ପାଚେ ପର୍‌ମେସ୍ୱର୍‌ ଲାହାଂ ବେଟା ଆନି କାଜିଂ ମସା ମାନାୟ୍‌ରିଂ ଚାଉଣିତାଂ ହପ୍‌ଚି ତାହିୱାତାନ୍‌, ହେବେ ହେୱାର୍‌ ମାଡ଼ିନି ତାରେନ୍‌ ନିଲ୍‍ତାର୍‌ । 18 ହେଏଚେକାଡ଼୍‌ଦ ସିନୟ ମାଡ଼ି କଦାସି ମାଚାତ୍‌ । ଇନେକିଦେଂକି ନିତ୍ରେମାପ୍ରୁ ନାଣି ଗଡ଼ାତ ଜପିତାଂ ଜୁତ୍‌ତାନ୍‌; ହେବେ ବାଟିନି କଦା ଲାକେ ହେବେତାଂ କଦା ନିଂତାତ୍‌, ଆରେ, ୱିଜ଼ୁ ମାଡ଼ି ବେସି ଚାମ୍‌କାତାତ୍ । 19 ଆରେ, ମରିଗାଜ୍ରାନି ଲାଗାଜ଼ି ବେସିତାଂ ବେସି ଆତିଲେ, ତାପାଚେ ମସା କାତା ଇଚାନ୍‌, ପାଚେ ପର୍‌ମେସ୍ୱର୍‌ ର ସବଦ୍‌ ହୁକେ ତାଂ ଉତର୍‌ ହିତାନ୍‌ । 20 ଇଦାଂପାଚେ ନିତ୍ରେମାପ୍ରୁ ସିନୟ ମାଡ଼ି ଗବା, ଇଚିସ୍‌, ମାଡ଼ିନି ଗବାତ ଜୁତ୍‌ତି ପାଚେ ମସା ହେ ମାଡ଼ି ଗବାତିଂ କୁକ୍‌ତାନ୍‌: ପାଚେ ମସା ଦୁମ୍‌ତାନ୍‌ । 21 ହେପାଦ୍‌ନା ନିତ୍ରେମାପ୍ରୁ ମସାଂ ଇଚାନ୍‌, "ଏନ୍‌ ଜୁଜ଼ି ହାଲ୍‌ଜି ମାନାୟ୍‌ରିଂ ଡାଟ୍‌ ବଲ୍‌ ହିଆ, ନଲେ ନିତ୍ରେମାପ୍ରୁ ହୁଡ଼୍‌ନି କାଜିଂ ହାନ୍ଦି ଉଡ଼ା ଆତିସ୍‌, ହେୱାର୍‌ ବିତ୍ରେତାଂ ଆଦେକ୍‌ ନାସ୍‌ ଆନାର୍‌ । 22 ଆରେ ଇମ୍‌ଣି ମାପ୍ରୁହେବାକିନାକାର୍‌ ଲାଗାୟ୍‌ଆଜ଼ି ମାନାର୍‌, ହେୱାର୍‌ ପା ଜାର୍‌ତିଂ ପୁଇପୁୟା କିଏର୍‌, ନଲେ ହେୱାନ୍‌ ହେୱାରିଙ୍ଗ୍‌ ମାଡିବହା ଆନାନ୍‌ ।"

23 ପାଚେ ମସା ନିତ୍ରେମାପ୍ରୁଙ୍ଗ୍‌ ଇଚାନ୍‌, "ଲକୁ ସିନୟ ମାଡ଼ିତ ଦୁମ୍‍ଦେଂ ଆଡୁର୍‌; ଇନେକିଦେଂକି ଏନ୍‌ ଡାଟ୍‌ ବଲ୍‌ ହିଜ଼ି ମାଂ ଇଞ୍ଜାୟ୍‌ନା, ମାଡ଼ିନି ହାନ୍ଦି ରଚାଟ୍‌ ଆରି ହେଦାଂ ପୁଇପୁୟା କିୟାଟ୍‌ ।"

24 ତେବେ ନିତ୍ରେମାପ୍ରୁ ତାଂ ଇଚାନ୍‌, "ହାଲା, ଜୁୱା; ଆରେ, ଏନ୍‌ ହାରଣ୍‌ତିଂ ସାଙ୍ଗ୍‌ ଅଜ଼ି ଦୁମ୍‌ନାଦେର୍‌; ମତର୍‌ ମାପ୍ରୁହେବାକିନାକାର୍‌ ଆରି ମାନାୟାର୍ ଜପି ନିତ୍ରେମାପ୍ରୁ ଇନେସ୍ ମାଡିବହା ଆଉନ୍‌, ଇଦାଂକାଜିଂ ହେୱାର୍‌ ତା ଲାଗାୟ୍‌ ୱାନି କାଜିଂ ହାନ୍ଦି ନାମେର୍‌ ।" 25 ପାଚେ ମସା ମାନାୟ୍‌ତି ଲାଗାୟ୍‌ ଜୁଜ଼ି ହାଲ୍‌ଜି ହେୱାରିଙ୍ଗ୍‌ ହେ ବାନି ବଲ୍‌ ହିତାନ୍‌ ।