1 ଇଦାଂପାଚେ ନିତ୍ରେମାପ୍ରୁ ଇସବୁ କାତା ଇଚାନ୍‌, 2 "ଇନେର୍‌ ନିଂ ଆଡ଼ିଏନ୍‌ଇଲ୍‌ ଲାକେ ମିସର୍‌ ଦେସ୍‌ତାଂ ହପ୍‌ଚି ତାହିୱାତ୍‌ତାନା, ମି ହେ ନିତ୍ରେମାପ୍ରୁ ପର୍‌ମେସ୍ୱର୍‌ ଆନ୍‌ ।"

3 ନା ମୁମ୍‌ଦ ନିଦାଂ ଆରେ ଇମ୍‌ଣାକାପା ପେନ୍‌ ଆଉତ୍‌ । 4 ଏନ୍‌ ଜାର୍‌ କାଜିଂ ଇମ୍‌ଣାକାପା କାର୍ତି ପୁତ୍‌ଡ଼ା ରଚୁଦେର୍‌; କି ଜପ୍‌ଣିବାହାନି ସାର୍ଗେତ, କି ତାରେନ୍‌ନି ପୁର୍ତିତ, କି ପୁର୍ତିନି ତାରେନ୍‌ନି ଏସ୍ତ ମାନି ଇମ୍‌ଣାକାପା ଆଡ଼୍‌ମାଡ଼୍‌ ଜାର୍‌ମୁର୍ତି ରଚ୍‌ମାଟ୍‌ । 5 ଏପ୍‌ ହେୱାକାଂ ଜୱାର୍‌ କିଉଦେର୍‌, କି ହେୱାକାଂ ହେବା କିଉଦେର୍‌; ଇନେକିଦେଂକି ଆପ୍‌ ମି ନିତ୍ରେମାପ୍ରୁ ପର୍‌ମେସ୍ୱର୍‌ ଜାର୍‌ଜାଜ୍‌ମାଲ୍‌ତାଂ-ରାକ୍ୟାତାଂ ତିର୍‌କାଡ଼୍‌ ପର୍‌ମେସ୍ୱର୍‌, ଆରେ, ଇମ୍‌ଣାକାର୍‌ ମାଂ ଗିଣ୍‌ କିଦ୍‌ନାର୍‌, ଆପ୍‌ ହେୱାରିଙ୍ଗ୍‌ ତିନ୍‌ ଆରି ଚାର୍‌ ହୁଡ଼୍‌ ପାତେକ୍‌ ହିମ୍‌ଣାଙ୍ଗ୍‌ ଜପି ଆକର୍‌ତି ଡାଣ୍ଡ୍‌ ପାତିପାଡ଼୍‌ହିଦ୍‌ନାକାନ୍‌; 6 ମତର୍‌ ଇମ୍‌ଣାକାର୍‌ ମାଂ ଜିଉନଦ୍ନାର୍‌ ଆରି ମା ବଲ୍‌ ମାନି କିନାର୍‌, ଆପ୍‌ ହେୱାରିଙ୍ଗ୍‌ ହାଜାର୍‌ ହାଜାର୍‌ ହୁଡ଼୍‌ ପାତେକ୍‌ ଦୟାକିନାକାପ୍‌ । 7 ଏପ୍‌ ଜାର୍‌ ନିତ୍ରେମାପ୍ରୁ ପର୍‌ମେସ୍ୱର୍‌ ତର୍‌ ମିଚ୍‌ତ ଅଉଦେର୍‌; ଇନେକିଦେଂକି ହେୱାନ୍ତି ତର୍‌ ମିଚ୍‌ତ ଅନାନ୍‌, ନିତ୍ରେମାପ୍ରୁ ତାଙ୍ଗେଙ୍ଗ୍‌ ଦସି ଇଞ୍ଜି ଗାଣା କିଉନ୍‌ । 8 ଜମ୍‌ନିବାର୍‌ ପୁଇପୁୟା ଲାକେ ମାନିକିଦେଂ ଏତୁ କିୟାଟ୍‌ । 9 ଚଅ ଦିନ୍‌ କସ୍ଟ କିୟାଟ୍‌ ଆରି ଜାର୍ତି ସବୁ ହେବା କିନାଦେର୍‌; 10 ମତର୍‌ ସାତ୍‌ ଦିନ୍ତ ମି ନିତ୍ରେମାପ୍ରୁ ପର୍‌ମେସ୍ୱର୍‌ ଜମ୍‌ନିବାର୍‌; ହେବେ ଏପ୍‌, କି ମି ମାଜ଼ି, କି ମି ଗାଚ୍‌କୁ, ମି ଆଡ଼୍‌ୟାର୍‌, କି ଆଡ଼ିଏଣିକ୍‌, ମି ପସୁ, କି ମି ଗାଡ଼୍‌ଦିଦୁଆର୍‌ନି ବିଦେସ୍‌ନିକାର୍‌, ଇନେର୍‌ ଇମ୍‌ଣାକାନ୍‌ପା କାମାୟ୍‌ କିଉଦେର୍‌ । 11 ଇନେକିଦେଂକି ନିତ୍ରେମାପ୍ରୁ ଆକାସ୍‌କାଂ ଆରି ପୁର୍ତି ଆରି ହାମ୍‌ଦୁର୍‌ ଆରି ତାତାରେନ୍‌ନି ସବୁ ଆଡ଼୍‍ମାଡ଼୍‌ ଚଅ ଦିନ୍ତ ରଚ୍‌ଚି ସାତ୍‌ ଦିନ୍ତ ଜମ୍‌ତାନ୍‌; ଇନେକିଦେଂକି ନିତ୍ରେମାପ୍ରୁ ଜମ୍‌ନିବାର୍‌ ଆର୍ସିବାଦ୍‌ କିଜ଼ି ପୁଇପୁୟା କିତାନ୍ନା । 12 ଏପ୍‌ ଜାର୍‌ ଆବା ଆରି ଜାର୍‌ ଆୟାଙ୍ଗ୍‌ ମାନି କିୟାଟ୍‌; ହେବେ ମି ନିତ୍ରେମାପ୍ରୁ ଇସ୍ୱର୍‌ ନିଂ ଇମ୍‌ଣି ଦେସ୍‌ ହିଦ୍‌ନାନ୍‌, ହେ ଦେସ୍‌ତ ନିଦାଂ ବେସି ବାର୍‌ହୁ ଜିନାଦେର୍‌ ।

13 ଏପ୍‌ ନାର୍‌ ଅହ୍‌ମାଟ୍ ।

14 ଏପ୍‌ ଦାରି କିମାଟ୍‌ ।

15 ଏପ୍‌ ଚରି କିମାଟ୍‌ ।

16 ଏପ୍‌ ମି ପାଡ଼୍‌ହାଞ୍ଜି ବିରୁଦ୍‌ତ ମିଚ୍‌ ସାକି ହିଉଦେର୍‌ ।

17 ଏପ୍‌ ମି ପାଡ଼୍‌ହା ଇଞ୍ଜିଙ୍ଗ୍‌ ଲାବ୍‌ଡ଼ି କିଉଦେର୍‌, ଏପ୍‌ ମି ପାଡ଼୍‌ହାଞ୍ଜି ଡକ୍ରିଂ, କି ଆଡ଼୍‌ୟାର୍‌, କି ଆଡ଼ିଏଣିକ୍‌, କି ତା କଡିଂ, କି ଗଦ, କି ମି ପାଡ଼୍‌ହାଞ୍ଜିନି ଇମ୍‌ଣାକାପା ଆଡ଼୍‌ମାଡ଼୍‌ଦିଂ ଲାବ୍‌ଡ଼ି ଆମାଟ୍‌ ।

18 ହେପାଦ୍‌ନା ୱିଜାର୍‌ ମାନାୟ୍‌ ବାଦାଡ଼୍‌ ଗାର୍ଜାନାକା ଆରି ବିଜ୍‌ଲି ଆରି ମରିଗାର୍ଜାନାକା ଆରି କଦାମେହାତି ମାଡ଼ି ହୁଡ଼୍‌ତିସ୍‌; ଆରେ, ହେଦାଂ ହୁଡ଼୍‌ଜି ତ୍ରିଗ୍‌ଜି ଦେହା ନିଲ୍‌ତାର୍‌ । 19 ଆରେ ହେୱାର୍‌ ମସାଂ ଇଚାର୍‌, "ଏନ୍‌ ମା ଲାହାଂ କାତା ଇଞ୍ଜା, ଆପେଙ୍ଗ୍‌ ୱେନାପ୍‌; ମତର୍‌ ପର୍‌ମେସ୍ୱର୍‌ ମା ଲାହାଂ କାତା ଇଞ୍ଜ୍‌ମେନ୍‌, ନଲେ ଆପେଙ୍ଗ୍‌ ହାନାପ୍‌ ।"

20 ପାଚେ ମସା ମାନାୟ୍‌ରିଂ ଇଚାନ୍‌, "ପାଣ୍ଡ୍ରା ଆମାଟ୍‌; ଇନେକିଦେଂକି ମିଂ ପରିକ୍ୟା କିଦେଂ ଆରି ଏପେଙ୍ଗ୍‌ ଇନେସ୍‌ ପାପ୍‌ କିଉଦେର୍‌, ଇଦାଂକାଜିଂ ତାଦି ପାଣ୍ଡ୍ରାନାକା ମି ଆଗେ ଚଞ୍ଜ୍ୟାଆଦେଂ ପର୍‌ମେସ୍ୱର୍‌ ୱାତାନ୍ନା ।" 21 ଲାଗିଂ ମାନାୟାର୍‌ ଦେହା ନିଲ୍‌ଚି ମାଚିସ୍‌; ମତର୍ ଇମେତାକେ ପର୍‌ମେସ୍ୱର୍‌ ମାଚାନ୍‌, ମସା ହେ ଇଲ୍‌ନି ଉୱାଁସ୍‌ ମାଜ୍‌ଗା ଲାଗାୟ୍‌ ହାଚାନ୍‌ ।

22 ଇଦାଂପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏନ୍‌ ଇସ୍ରାଏଲ୍‌ ମାଜ଼ିରିଂ ଇ କାତା ୱେଚା, ଆପ୍‌ ସାର୍ଗେତ ମାନ୍‌ଞ୍ଜି ମି ଲାହାଂ କାତା ଇନ୍‌ଚାପ୍‌, ଇଦାଂ ଏପେଙ୍ଗ୍‌ ନିଜେ ହୁଡ଼୍‌ତାଦେର୍ଣ୍ଣା 23 ଇଦାଂ କାଜିଂ ଏପେଙ୍ଗ୍‌ ମା ଲଡ଼ାକିନି, ବିନ୍‌ ପେନ୍‌କୁ ରଚୁଦେର୍‌; ଜାର୍‌ କାଜିଂ ରୁପା ପେନ୍‍କୁ ଆରି ହନାନି ପେନ୍‌କୁ ରଚୁଦେର୍‌ । 24 ଏପ୍‌ ମା କାଜିଂ ର ଚିକ୍‌ଲାନି ଗାର୍‌ଣି ରଚ୍‌ନାଦେର୍‌, ଆରେ, ତା ଜପି ମି ଅଡା କାଟ୍‌ପୁଜା* ଆରି ମଙ୍ଗଲ୍‌ଆନି ପୁଜାପାଣି କିନାଦେର୍‌; ଆପ୍‌ ଇମ୍‌ଣି ପାତି ବାହାତ ନା ତର୍‌ ଏତ୍‌ କିୟ୍‌କିନାପ୍‌, ହେ ପାତି ବାହାତ ଆପ୍‌ ମି ଲାଗାୟ୍‌ ୱାଜ଼ି ମିଂ ଆର୍ସିବାଦ୍‌ କିଦ୍‌ନାପ୍‌ । 25 ଜଦି ଏନ୍‌ ମା କାଜିଂ କାଲ୍‌ ଗାର୍‌ଣି ରଚ୍‌ନାୟ୍‌, ତେବେ କାର୍ତି କାଲ୍‌ଦ ହେଦାଂ ରଚୁୟ୍‌; ଇନେକିଦେଂକି ତା ଜପି ଏନ୍‌ ନା ବିନ୍ଦ୍‌ଣା ପେସ୍‌ତାନ୍‌, ହେଦାଂ ବିଟାଡ଼୍‌ କିନାୟ୍‌ । 26 ଆରେ ନି ନାଗ୍‌ଡ଼ା ମା ଗାର୍‌ଣି ଜପି ଇନେସ୍‌ ୱିଣ୍ଡ୍‌ମେତ୍‌, ଇଦାଂକାଜିଂ ଏନ୍‌ ଡେପାଂ ହିଜ଼ି ମା ଗାର୍‌ଣି ଜପି ହାଲୁଦେର୍ ।"