1 ଇଦାଂପାଚେ ହେୱାନ୍‌ ମସାଂ ଇଚାନ୍‌, "ଏନ୍‌, ହାରଣ, ନାଦବ, ଅବିହୁ ଆରି ଇସ୍ରାଏଲ୍‌ନି ବୁଡ଼ାଲୁର୍‌ ସତୁରି ଜାଣ୍‌, ଏପେଙ୍ଗ୍‌ ନିତ୍ରେମାପ୍ରୁତି ଲାଗେ ଦୁମ୍‌ଜି ବେସି ଦେହା ମାଞ୍ଜି ହେୱାନ୍ତି କେରାଟ୍‌ । 2 କେବଲ୍‌ ମସା ନିତ୍ରେମାପ୍ରୁତି ଲାଗେ ୱାନାନ୍‌, ମତର୍‌ ହେୱାର୍‌ ଲାଗେ ୱାଉର୍‌, କି ମାନାୟାର୍‌ ତା ଲାହାଂ ଦୁମୁର୍‌ ।"

3 ତେବେ ମସା ୱାଜ଼ି ନିତ୍ରେମାପ୍ରୁତି ହେ ସବୁ ବଚନ୍‌ ଆରି ନିୟମ୍‌ ବିସ୍ରେ ମାନାୟାରିଙ୍ଗ୍‌ ଇଚିଲେ, ୱିଜ଼ାର୍‌ ର କାଟ୍‌ତ ଉତର୍‌ କିତାର୍‌, "ନିତ୍ରେମାପ୍ରୁ ଇମ୍‌ଣି ସବୁ କାତା ଇଞ୍ଚାନ୍ନା, ହେଦାଂ ସବୁ ଆସେଙ୍ଗ୍‌ ପାଲି କିନାସ୍‌ ।" 4 ଇଦାଂପାଚେ ମସା ନିତ୍ରେମାପ୍ରୁତି ୱିଜ଼ୁ ବଚନ୍‌ ଲେକିକିତାନ୍‌, ଆରେ, ନାଡ଼ିହିଂ ନିଂଜି ମାଡ଼ି ତାରେନ୍‌ ର ପୁଜାଗାର୍‌ଣି ଆରି ଇସ୍ରାଏଲ୍‌ନି ବାର ବଁସ୍‌ଇସାବ୍ରେ ବାର କାଲ୍‌ ମୁଣ୍ଡାଙ୍ଗ୍‌ ରଚ୍‌ଚାର୍‌ । 5 ଆରେ, ହେୱାନ୍‌ ଇସ୍ରାଏଲ୍‌-ହିମ୍‌ଣାଙ୍ଗ୍‌ନି ବେଣ୍ଡ୍ୟାରିଙ୍ଗ୍‌ ପକ୍ତିଲେ, ହେୱାର୍‌ ନିତ୍ରେମାପ୍ରୁତି କାଜିଂ ହମ୍‌କାଜିଂ ଆରି ମଙ୍ଗଲ୍‌ କାଜିଂ ସଣ୍ଡ୍‌କୁକାଂ ପୁଜା କିତାର୍‌ । 6 ହେବେ ମସା ନେତେର୍‌ ଅଜ଼ି ହେବେ ଆଦା କଣ୍ଡିତ ଇଡ୍‌ତାନ୍‌, ଆରେ ଆଦା ନେତେର୍‌ ଗାର୍‌ଣି ଜପି ତିର୍ତାନ୍‌ । 7 ଆରେ, ନିୟମ୍‌ ପତି ଅଜ଼ି ମାନାୟାର୍ତି କିତୁଲ୍‌ତ ପଡ଼ି କିତାନ୍‌; ହେବେ ହେୱାର୍‌ ଇଚାର୍‌, "ନିତ୍ରେମାପ୍ରୁ ଇନାକା ଇନାକା ଇଞ୍ଚାନ୍ନା, ହେଦାଂ ସବୁ ଆପେଙ୍ଗ୍‌ ମାନି କିନାପ୍‌ ଆରି ବଲ୍‌ମାନି କିନାପ୍‌ ।"

8 ପାଚେ ମସା ହେ ନେତେର୍‌ ଅଜ଼ି ମାନାୟାର୍‌ ଜପି ତିର୍ଚି ଇଚାନ୍‌, "ହୁଡ଼ାଟ୍‌, ନିତ୍ରେମାପ୍ରୁ ମି ଲାହାଂ ଇ ୱିଜ଼ୁ ବଚନ୍‌ ବିସ୍ରେ ଇମ୍‌ଣି ନିୟମ୍‌ କିତାନ୍ନା, ହେ ନିୟମ୍‌ନି ନେତେର୍‌ ଇଦାଂ ।" 9 ତେବେ ମସା, ହାରଣ, ନାଦବ, ଅବିହୁ ଆରି ଇସ୍ରାଏଲ୍‌ନି ବୁଡ଼ାଲୁର୍‌ ସତୁରି ଜାଣ୍‌ ଦୁମ୍‌ତାର୍‌; ଆରେ ହେୱାର୍‌ ଇସ୍ରାଏଲ୍‌ନି ଇସ୍ୱର୍‌ତିଙ୍ଗ୍‌ ହୁଡ଼୍‌ତାର୍‌ । 10 ଆରେ, ହେୱାନ୍ତି ଇସ୍ରାଏଲ୍‌ ପାନା ତାରେନ୍ ବାହା ଅଜଡ଼୍‌ ନିଲ୍ୟାକାନ୍ତ ମଣି ରଚ୍‍ଚି ଇଟା କାମାୟ୍‌ ଲାକେ ଆରି ନିର୍ମଲ୍‌ନି ସମାନ୍‌ ଆକାସ୍‌ ପେନ୍‌ ଲାକେ ମାଚାତ୍‌ । 11 ଆରେ ହେୱାନ୍‌ ଇସ୍ରାଏଲ୍‌-ହିମ୍‌ଣାଙ୍ଗ୍‌ନି ମୁଣିକାର୍‌ତି ବିରୁଦ୍‌ତ କେଇ ଲାମାୟ୍‌ କିୱାତାନ୍‌; ମତର୍‌ ହେୱାର୍‌ ଇସ୍ୱର୍‌ତିଂ ହୁଡ଼୍‌ତାର୍, ଆରେ, ଚିଚାର୍‌ ଆରି ଉଟାର୍ ।

12 ଇଦାଂପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏନ୍‌ ମାଡ଼ି ଦୁମ୍‌ଜି ମା ଲାଗେ ୱାଜ଼ି ଇ ବାହାତ ମାନାଟ୍; ହେବେ ଆପ୍‌ ମାନାୟାର୍ତି ହିକ୍ୟା କାଜିଂ ଇନାକା ଲେକିକିତାପ୍ନା, ହେଦାଂ, ଇଚିସ୍‌, ବିଦି ଆରି ବଲ୍‌ ବିସ୍ରେ ରିଣ୍ଡି ଲେକାସିମାନି କାଲ୍‌କୁ ପାଟା ହିଦ୍ନାପ୍‌ ।" 13 ହେବେ ମସା ଆରି ହେୱାନ୍ତି ହେବାକାରି ଜିହସୁୟ ନିଂତାନ୍‌; ଆରେ, ମସା ପର୍‌ମେସ୍ୱର୍‌ ମାଡ଼ିତ ଦୁମ୍‌ତାନ୍‌ । 14 ଆରେ ହାଉକାର୍‌ ବୁଡ଼ାଲୁରିଂ ଇଚାନ୍‌, "ଆପେଙ୍ଗ୍‌ ଏଚେପାତେକ୍‌ ନି ଲାଗେ ମାସ୍‌ଦି ୱାମେନ୍‌, ହେପାତେକ୍‌ ଏପେଙ୍ଗ୍‌ ମାଂ କାସି ଇବେ ମାନାଟ୍‌; ହୁଡ଼ାଟ୍‌, ହାରଣ ଆରି ହୁର ମି ଲାଗେ ମାନାର୍‌, ଇନେର୍ତି ଇନାକାପା କିର କାତା ମାଚିସ୍‌, ହେୱାନ୍‌ ହେୱାର୍‌ ଲାଗେ ହାଲେନ୍‌ ।"

15 ଇଦାଂପାଚେ ମସା ମାଡ଼ିତ ଦୁମ୍‌ତାନ୍‌, ଆରେ, ବାଦାଡ଼୍‌ ମାଡ଼ିତିଂ ପ୍ଡାକ୍ତାତ୍‌ । 16 ହେବେ ସିନୟ ମାଡ଼ି ଜପି ନିତ୍ରେମାପ୍ରୁତି ଜାଜ୍‌ମାଲ୍‌ ଏକାତାତ୍‌; ଆରେ ହେଦାଂ ଚଅ ଦିନ୍‌ ବାଦାଡ଼୍‌ ପ୍ଡାକ୍ୟାସି ମାଚାତ୍‌; ତାପାଚେ ହେୱାନ୍‌ ସାତ୍ ଦିନ୍ତ ବାଦାଡ଼୍‌ ବିତ୍ରେତାଂ ମସାଂ କୁକ୍ତାନ୍‌ । 17 ହେବେ ଇସ୍ରାଏଲ୍‌ ହିମ୍‌ଣାଙ୍ଗ୍‌ନି କାଣ୍‌କୁତ ମାଡ଼ି ଗବାତ କାଡ଼୍‌ନି ନାଣି ଲାକେ ନିତ୍ରେମାପ୍ରୁତି ଜାଜ୍‌ମାଲ୍‌ ଚଞ୍ଚାତ୍‌ । 18 ଆରେ, ମସା ବାଦାଡ଼୍‌ ବିତ୍ରେ ହଣ୍‌ଜି ମାଡ଼ି ଜପି ନିଂଜି ରିକଡ଼ି ଦିନ୍‌ ୱେଡ଼ାନାଣା ହେ ମାଡ଼ି ଜପି ମାଚାନ୍‌ ।